“Logistika — bu faqat yuk tashish emas. Bu jarayonlarni optimallashtirish, muammolarni hal qilish va global iqtisodiyotning yuragini boshqarish san’atidir” deydi O‘zbekistonning logistika va ta’minot zanjiri sohasidagi yosh va maqsadli mutaxassislaridan biri Baxtiyor Komilov.
Farg‘ona vodiysida tug‘ilib o‘sgan Baxtiyorning karyera yo‘li — yangi imkoniyatlarni yaratish va global miqyosdagi e’tirofga erishish hikoyasidir.
Janubiy Koreyadagi yuqori sifatli ta’lim
Baxtiyor Komilovning ta’lim yo‘li O‘zbekistonda boshlanib, chet elda davom etgan. U 2016-yilda Janubiy Koreyadagi Chonnam milliy niversitetining iqtisodiyot va biznes boshqaruv bo‘yicha bakalavriyat dasturiga 100 foiz grant asosida qabul qilingan. Talabalik davrida universitetning Xalqaro talabalar ofisidagi faoliyati orqali u ko‘p millatli muhitda ishlash ko‘nikmalarini rivojlantirdi va xalqaro aloqalarni shakllantirdi.
Shuningdek, Baxtiyor Gvangju shahar ma’muriyati bilan Koreyaning tibbiy turizmini targ‘ib qilishda faol ishtirok etdi. U chet ellik bemorlarga yordam ko‘rsatib, kommunikatsiya va boshqaruv bo‘yicha amaliy ko‘nikmalar orttirdi. U mahalliy radioda muntazam chiqishlar qilib, jamoatchilik bilan ishlash bo‘yicha malakasini oshirdi.
Koreyadagi professional yuksalish
Qahramonimiz 2020-yilda bakalavr diplomini olganidan so‘ng o‘zi bitirgan nufuzli universitetida MBA (biznes boshqaruvi bo‘yicha magistratura) darajasida o‘qishni davom ettirish imtiyoziga ega bo‘ldi. Baxtiyorning izohlashi bo‘yicha, bu dastur unga biznesni yanada chuqurroq tushunishga va logistika qanday ishlashini o‘rganishga imkoniyat berdi.
MBA o‘qishi davomida Baxtiyor Koreyaning DXM Korea kompaniyasida xalqaro savdo va logistika bo‘yicha faoliyat yuritdi. U tibbiy uskunalarni Yevropa va Osiyo bozorlariga eksport qilish jarayonlarini boshqarib, kompaniya uchun yangi hamkorlik imkoniyatlarini yaratdi.
“Bu ishga kirishar ekanmiz, haqiqiy biznes jarayonlarda amaliy tajriba to‘pladim va karyeramning aynan mana shu bosqichi mening logistikaga bo‘lgan qiziqishimni yanada kuchaytirdi”, deydi u.
AQSHdagi faoliyat
2022-yilda Baxtiyor AQShning Missuri shtatidagi University of Missouri-St. Louis’da ikki darajali MBA dasturiga o‘qishga kirib, ta’minot zanjiri menejmenti bo‘yicha sertifikatga ega bo‘ldi. Bu yerda u o‘qish bilan birga talabalar uchun konsalting xizmatlari ko‘rsatib, logistika bo‘yicha bilimlarini bo‘lishdi. U, shuningdek, talabalar va professorlar bilan seminarlar tashkil etib, akademik muhitda faoliyat yuritdi.
AQSHda ikki darajali MBA dasturini tamomlagan Baxtiyor ta’minot zanjiri menejmenti sohasidagi malakasini yanada oshirdi. 2022-yil dekabr oyida u ERP tizimlarining ta’minot zanjirini mustahkamlashdagi ahamiyati haqida ilmiy maqola yozdi. Bu ishida u ERP tizimlarining pandemiya kabi global inqirozlar davrida ta’minot zanjirini barqaror saqlashdagi ahamiyatini tahlil qildi va zamonaviy texnologiyalar, masalan, cloud computing, big data va blockchainning ERP tizimlariga qo‘shgan hissasini yoritdi.
ERP tizimlari: Logistikada revolyutsiyalar poydevori
ERP (Enterprise Resource Planning) tizimlari — bu korxonalar uchun yagona tizimda barcha resurslar va jarayonlarni boshqarishga yordam beradigan dasturiy yechimlar. Baxtiyorning tadqiqotida ERP tizimlarining ta’minot zanjiridagi asosiy funksiyalari chuqur tahlil qilindi. ERP tizimlari nafaqat jarayonlarni markazlashtirish va resurslarni boshqarishda, balki real vaqt ma’lumotlari asosida qaror qabul qilishda ham muhim rol o‘ynaydi.
Baxtiyorning so‘zlariga ko‘ra, ERP tizimlari ta’minot zanjirining uchta asosiy oqimi – moddiy oqim, axborot oqimi va moliyaviy oqimni optimallashtirish orqali korxona samaradorligini oshiradi.
ERP tizimlarining texnologik jihatlarini tadqiq qilar ekan, u SAP S/4HANA, Oracle Fusion Cloud ERP va Microsoft Dynamics 365 kabi tizimlarning global ta’minot zanjirida qanday qo‘llanilishini o‘rganib chiqdi.
U ERP tizimlarining risklarni boshqarish, ish faoliyatini soddalashtirish va ta’minot zanjiri barqarorligini oshirishdagi amaliyotlariga katta e’tibor qaratdi.
Hozirgi faoliyati va kelajak rejalari
Baxtiyor AQShning ITF Group kompaniyasining HaulerHub platformasida menejer lavozimida ham faoliyat olib borgan. U transport kompaniyalarini ushbu platformaga integratsiyalash jarayonlarini boshqarib, 2000 dan ortiq transport kompaniyalarining samaradorligini oshirishga hissa qo‘shgan.
Bu lavozimda u ERP tizimlarining o‘ziga xos imkoniyatlarini amalda qo‘llash orqali ta’minot zanjirida raqobatbardoshlikni oshirishga yordam bergan.
Baxtiyorning kelajakdagi rejalari ham ERP tizimlari bilan uzviy bog‘liq.
U sun’iy intellektdan foydalangan holda logistika jarayonlarini yanada optimallashtirish uchun yangi platforma yaratish ustida ish olib bormoqda. Ushbu innovatsion yechim orqali u kichik va o‘rta biznes korxonalariga operatsion samaradorlikka erishishda yordam berishni maqsad qilgan.
Baxtiyor Komilovning muvaffaqiyat yo‘li va global maydondagi ta’siri O‘zbekistonda shu sohani o‘rganayotgan yoshlariga ilhom manbai bo‘la oladi. Baxtiyor o‘zining logistika va ta’minot zanjiri sohasidagi innovatsion yondashuvlari va yetakchilik qobiliyatlari unga kelgusida katta yutuqlar olib kelishiga ishonadi.
Saidaziz A’zamov
Izoh (0)