Janubiy Koreya kompaniyasi Farg‘ona viloyatining Furqat tumanida bioyoqilg‘i ishlab chiqarish loyihasini amalga oshirishi kutilmoqda. Bu haqda viloyat hokimligi matbuot xizmati xabar berdi.
Maʼlum qilinishicha, Furqat tumani hokimligi hamda Janubiy Koreyaning Korea Investment & Securities (KIS) moliyaviy tashkiloti, Koreya energetika agentligi tarkibidagi Korea Institute for Climate Change (KICC) muassasasi va Korea Western Power (KWP) kompaniyasi o‘rtasida viloyatda biochiqindilardan yoqilg‘i pelletlari hamda bioenergiya ishlab chiqarish loyihalarini amalga oshirish bo‘yicha hamkorlik memorandumi imzolangan.
Kelishuvga ko‘ra, birinchi bosqichda 3 mln dollar to‘g‘ridan to‘g‘ri xorijiy investitsiyalar hisobiga Furqat tumanida daraxt chiqindilari, g‘o‘zapoya, qurilish materiallariga yaroqsiz har xil turdagi daraxt va butalardan xomashyo sifatida foydalangan holda granula shaklidagi yoqilg‘i pelletlari ishlab chiqarish yo‘lga qo‘yiladi.
Ikkinchi bosqichda bioyoqilg‘idan foydalangan holda bioenergiya ishlab chiqarish investitsion loyihasini amalga oshirish rejalashtirilgan.
Koreyaning Yonhap agentligi xabariga ko‘ra, mahalliy fermerlarga issiqxonalarni ko‘mir bilan isitish o‘rniga g‘o‘zapoya bioyoqilg‘isidan foydalanish taklif etilmoqda. Bu orqali kelgusi 10 yil ichida atmosfera chiqindilarini 120 ming tonnaga kamaytirish kutilmoqda.
Izoh (0)