Janubiy Koreya teleseriallari va filmlari yulduzlari nafaqat o‘z vatanida, balki xorijda ham iste’dodi va jozibali ko‘rinishi tufayli katta mashhurlikka erishgan. Biror nuqsonsiz chehrasi, juda yosh ko‘rinishi, nafis harakatlari va kulgili obrazlari koreys aktrisalari uchun sharqona go‘zallikning ajralmas elementi bo‘lib qolgan. Quyida o‘zining noyob xarizmasi, filmlardagi ajoyib chiqishlari va go‘zalligi bilan kino sanoatida muvaffaqiyat qozongan koreys aktrisalari haqida so‘z yuritamiz.
Pak Shin He
Pak Shin Xe nafaqat Janubiy Koreyada, balki butun Osiyoda eng mashhur aktrisalardan biridir. 34 yoshli aktrisa mashhur “Vorislar”, “Doktorlar” serialida bosh rolni o‘ynagan. Shin Xe 19 yoshida rol o‘ynagan “Sen go‘zalsan!” seriali tufayli mashhur bo‘lib ketadi. Bundan tashqari, Shin Xe muvaffaqiyatli qo‘shiqchi bo‘lib, ikkita albomi yaratgan.
Aktrisa Forbes Korea Powerning mashhurlar ro‘yxatida 33-o‘rinni egallaydi. Tomoshabinlarni doim o‘ziga qarata olish qobiliyati tufayli u “Koreys dramasi go‘zali” unvoniga sazovor bo‘lgan. Par ijtimoiy loyihalar va filmlarda faol ishtirok etmoqda va uning xalqaro miqyosdagi mashhurligi o‘sishda davom etmoqda.
Son He Gyo
Koreys dramalari yulduzi Son He Gyo nafaqat Koreyada, balki butun dunyoda go‘zallik timsoliga aylangan. U “Kuz ertagi”, “Taqdir o‘yini”, “Oila”, “Bu qishda shamol esadi”, “Quyosh avlodlari” serialidagi bosh rollari bilan tanilgan. Aktrisa “Kuz ertagi” filmidagi roli uchun SBS Drama Awards’da “Eng yaxshi aktrisa” va “Baeksang Arts” mukofotini qo‘lga kiritgan. 2022-yilda esa u “Mashhurlik” teleserialida rol o‘ynagach, Koreyaning yetakchi aktrisalaridan biri sifatidagi maqomini mustahkamlagan.
Lim Su Chjon
Lim Su Chjon o‘zining katta va professional tajribasiga ega mashhur aktrisa. Uning rollarga o‘ziga xos yondashuvi uni xalqaro sahnadagi eng jozibali aktrisalardan biriga aylantirgan. Aktrisa “Seuldagi bedorlar”, “Men kiborgman, lekin bu normal”, “Melanxoliya”, “Maktab”, "Kechir, ammo seni sevaman” kabi film va seriallardagi rollari bilan shuhrat qozongan.
Lim Su Chjon “Rafiqam haqida barcha haqiqat” filmidagi ishtiroki uchun “Moviy ajdaho” mukofotining “Eng yaxshi ayol roli” nominatsiyasida g‘olib bo‘lgan.
Li Chji In (Ayu)
Ayu taxallusi bilan tanilgan Li Chji In 31 yoshli xonanda va aktrisa bo‘lib, musiqiy karyerasini 15 yoshida “Lost and Found” debyut albomi bilan boshlagan. U Janubiy Koreyaning yirik Mnet Asian Music Awards marosimida bir nechta musiqiy mukofotlarga sazovor bo‘lgan. Li Chji In o‘zining musiqiy va aktyorlik karyerasini muvaffaqiyatli birlashtira olgan. So‘nggi yillarda u bosh rolni o‘ynagan “Alvon Koryo”, “Mening janobim” teleseriali tufayli uning mashhurligi sezilarli darajada oshdi.
Ayu aktrisalik faoliyatini 2011-yilda boshlagan. U “Orzu”, “O‘rtakashlar”, “Qirmizi yurak”, “Prodyuserlar” kabi film va seriallarda rol o‘ynagan.
Pe Su Ji
2010-yildan 2017-yilga qadar Pe Su Ji mashhur “Miss A” guruhining a’zosi sifatida faoliyat yuritgan, ammo noma’lum sabablarga ko‘ra K-pop qizlar guruhi tarqalib ketgan. Shundan so‘ng Su Ji filmlarda rol o‘ynashni va televideniyeda chiqishni boshlagan. Aktrisa “Yulduzlardan kelgan odam”, “Toki uyquda ekansiz”, “Telba oshiqlar” kabi dramalaridagi rollari bilan tomoshabinlar yodida qolgan.
“Gu oilasi haqiqda kitob” tarixiy seriali Pe Su Ji karyerasidagi haqiqiy yutuq bo‘ldi: mazkur rol unga Forbes Power Celebrity 40 reytingida uchinchi o‘ringa chiqishiga sabab bo‘ldi. Su Jining muxlislari uning ona shahrida aktrisa nomidagi kichik muzeyni tashkil qilishgan.
Yun Yu Chjun
Ushbu aktrisa koreys kino va teatrida ko‘p yillik tajribaga ega. U 1947-yil 19-iyulda Janubiy Koreyada tug‘ilgan. Yun Yu Chjun o‘zining karyerasini 1970-yillarda boshlagan va tez orada Koreyaning eng mashhur va taniqli aktrisalaridan biriga aylangan. U asosan drama va komediyalardagi ko‘plab rollari bilan tanilgan. 2021-yilda u “Minari” filmidagi roli bilan xalqaro muvaffaqiyatga erishdi va Oskar mukofotining “Eng yaxshi aktrisa” nominatsiyasida g‘olib bo‘ldi. Bu uning karyerasidagi eng yirik yutuqlardan biri bo‘ldi. Shuningdek, Yu Chjun Amerika aktyorlari gildiyasi, Britaniya Akademiyasi Film mukofotlarini ham olgan.
U “Olov ayol”, “Oqsoch”, “Erimning oilasi paydo bo‘ldi”, “Pachinko” kabi loyihalari bilan tanilgan.
Izoh (0)