2022-yilda suyultirilgan gaz (LNG) tashish uchun tankerlar qurish bilan shug‘ullanuvchi kompaniyalar rekord miqdordagi shartnomalar imzoladi. Bu haqda Refinitiv tahliliy kompaniyasi ma’lumotlariga tayanib Financial Times xabar berdi.
O‘tgan yili butun dunyo bo‘ylab kemasozlik zavodlari LNG tankerlarini qurish bo‘yicha 163 ta buyurtma oldi. Bu faqat 2021-yildagidan ikki barobar ko‘p emas, balki 2011-yildan beri eng yuqori ko‘rsatkichdir.
Ushbu bozorda yetakchi bo‘lgan Janubiy Koreyaning KSOE (Korea Shipbuilding & Offshore Engineering) korporatsiyasi hozirgi tendensiya “kamida ikki-uch yil davom etishini” bildirdi. Buning natijasida kompaniya yiliga 50 ta yangi shartnoma tuza olishiga ishonmoqda.
Tahlilchilarning ta’kidlashicha, LNG tankerlarini qurish bo‘yicha rekord miqdordagi buyurtmalar ko‘p jihatdan Qatardagi Shimoliy Field Sharqiy gaz konining kengayishi bilan bog‘liq.
Ushbu loyiha Qatar hukumatiga 2027-yilga borib LNG eksport quvvatini yiliga 77 million tonnadan 126 million tonnagacha oshirish imkonini beradi.
Xalqaro gaz ittifoqi hisob-kitoblariga ko‘ra, Shimoliy Field East loyihasining o‘zi uchun 150 ga yaqin tanker kerak bo‘ladi.
“Bu shunchaki talab va taklif masalasi. Bozor nisbatan qisqa vaqt ichida misli ko‘rilmagan talabni boshdan kechirmoqda”, — dedi Brayemar eksperti Endryu Selbi Bennet.
Ta’kidlanishicha, yangi buyurtmalarning aksariyati 2026-yil oxirigacha yakunlanadi. Xalqaro gaz ittifoqi ma’lumotlariga ko‘ra, o‘tgan yilning aprel oyi holatiga ko‘ra, bozorda suyultirilgan gazni minus 163 daraja haroratda tashishga qodir bo‘lgan 640 ga yaqin tanker bor bo‘lgan.
Shu bilan birga, ushbu kemalarning qariyb 70 foizi Janubiy Koreyadagi zavodlarda qurilgan. 2022-yildagi buyurtmalarning asosiy qismi ular hissasiga to‘g‘ri keldi (jami 64 foiz yoki 105 ta shartnoma).
Mutaxassislar 2022-yilda LNG tankerining o‘rtacha narxi bir yil avval 200 million dollardan 250 million dollarga oshganiga e’tibor qaratdi. Bu sohada ishchi kuchi yetishmasligi, oqibatda xarajatlarning oshishi bilan izohlanmoqda.
Shu bilan birga, Rystad Energy konsalting kompaniyasi tahlilchisi Kaushal Ramesh Xitoy tankerlarining narxi 20-30 million dollarga arzonlashishi mumkinligini ta’kidladi. Refinitiv ma’lumotlariga ko‘ra, Xitoydagi zavodlarga berilgan shartnomalar soni o‘tgan yili 57 taga ko‘paygan.
Izoh (0)