Janubiy Koreya prezidenti Yun Sok Yol ikki yil avval qoidalarni buzgan holda rafiqasi sovg‘a qilingan qimmatbaho sumkani olgani uchun omma oldida uzr so‘radi. Bu haqda Korea Herald xabar berdi.
“Xotinimning o‘ylamay qilgan xatti-harakati tufayli jamoatchilikda uyg‘otgan tashvishi uchun uzr so‘rayman”, — dedi Yun Sok Yol jonli efirda.
Tegishli bayonot Koreya rahbarining rafiqasi Kim Gon Xi atrofida 2022-yilda yuzaga kelgan mojaro sababli yangradi. O‘shanda prezident rafiqasi koreys millatiga mansub amerikalik ruhoniydan 3 million von (2,2 ming dollar)lik qimmatbaho Christian Dior sumkasini sovg‘a sifatida qabul qilgandi. O‘shanda ruhoniyning o‘zi Kim Gon Xo bilan suhbatlashish jarayonini yashirincha tasvirga olgan. Videoda sovg‘a qilingan sumka ham ko‘ringan.
Bularning barchasi katta janjalni keltirib chiqargan, bu nafaqat prezident va uning rafiqasi, balki butun hukmron partiyaning obro‘siga jiddiy putur yetkazgan. Biroq Yun Sok Yol uzoq vaqt davomida mojaroga javob berishdan bosh tortgan va hodisa yuzasidan mustaqil tergov o‘tkazish talablarini e’tiborsiz qoldirgan.
Natijada hatto hukmron partiyada ham prezidentdan janjalga oshkora javob berishni talab qila boshlashgan. Siyosatshunoslarga ko‘ra, 10-aprel kuni bo‘lib o‘tgan parlament saylovlarida hukmron partiyaning mag‘lubiyatga uchrashiga “prezident rafiqasi sumkasi bilan bog‘liq janjal” sabab bo‘lgan.
Mamlakat aholisining 70 foizga yaqini tergov o‘tkazilishini talab qilgan. Bir necha kun avval Janubiy Koreya rasmiylari Koreya Bosh prokuraturasi Kim Gon Xining markali sumka ko‘rinishidagi qimmatbaho sovg‘a olish ishi bo‘yicha ishini rasman ko‘rib chiqqanini ma’lum qilgandi. Mazkur ish ustida bir qancha taniqli prokurorlar ishlamoqda.
Matbuot anjumani chog‘ida Yun Sok Yol shaxsan uzr so‘rashdan tashqari, mojaroga oid tafsilotlar aytishdan bosh tortgan. Shuningdek, bu ish bo‘yicha tergov allaqachon olib borilayotgani va uning bayonotlari tergov jarayoniga ta’sir o‘tkazishga urinish sifatida qabul qilinishini bildirgan.
Izoh (0)