19-iyun kuni Filippinning Sebu shahridan Janubiy Koreyaning Inchxon shahriga uchayotgan Jeju Air samolyoti yo‘lovchisi parvoz vaqtida samolyot eshiklarini ochmoqchi bo‘ldi, deb yozadi The Korea Times.
Aviakompaniya maʼlumotlariga ko‘ra, havoga ko‘tarilganidan taxminan bir soat o‘tgach, ichida 180 kishi bo‘lgan Boeing 737 yo‘lovchisi o‘zini g‘alati tuta boshlagan va styuardessalarga ko‘krak qafasidagi bosimdan shikoyat qilgan.
Parvoz ekipaji undan avariyaviy chiqish joyi yonidagi o‘rindiqqa o‘tishni so‘ragan, biroq erkak chiqish tomonga yugurib borib, samolyot eshiklarini ochishga uringan. Guvohlarning ta’kidlashicha, u harakatlari davomida: “Eshiklarni ochaman va hammani o‘ldiraman” deb baqirgan.
Bort kuzatuvchilari va boshqa yo‘lovchilar uni zararsizlantirishga muvaffaq bo‘lgan. Parvoz yana uch soat davom etgan va samolyot qo‘ngach, qoidabuzar politsiyaga topshirilgan.
Samolyotdagilarning hech biri jabrlanmagan.
Eslatib o‘tamiz, may oyi oxirlarida Janubiy Koreyada Asiana Airlines aviakompaniyasiga tegishli samolyotning avariyaviy chiqish eshigi parvoz paytida ochilib ketgan edi. Bortda 200 kishi bo‘lgan. 12 kishi yengil tan jarohati olgan, to‘qqiz nafar yo‘lovchi havo yetishmasligi sabab kasalxonaga yotqizilgan.
Eshikni uning yonida o‘tirgan yo‘lovchilardan biri ochgani ma’lum qilindi.
Izoh (0)