Shimoliy Koreyada Kim Chen In va qizining suratlari tushirilgan markalar taqdim etildi. Ular 2022-yilning noyabr oyida o‘tkazilgan “Xvason-17” qit’alararo ballistik raketasi sinoviga bag‘ishlangan. Markalar KXDR pochtasi saytida chop etildi.
G‘arb ekspertlarining fikriga ko‘ra, o‘n yoshli Kim Chu Ening otasi bilan tushgan surati fonidagi “Xvason-17” raketa kompleksi 15 ming km masofani bosib o‘tadi va bir vaqtning o‘zida bir nechta yadroviy zaryadlarni nishonga yetkazishga qodir bo‘lgan alohida-alohida jangovar kallaklarga ega.
O‘tgan hafta Shimoliy Koreya yetakchisining qizi KXDR armiyasi tashkil etilganining 75 yilligiga bag‘ishlangan harbiy paradda ishtirok etgandi, shundan so‘ng Janubiy Koreya OAVlari uning davlat rahbari vorisi bo‘lishi ehtimolini muhokama qila boshladi.
8-fevral kuni ham Kim Chen In qizi bilan ommaga ko‘rinish bergan. O‘shanda qiz ota-onasi bilan Koreya xalq armiyasining 75 yilligi munosabati bilan o‘tkazilgan tadbirlarda qatnashgan.
Noyabrga qadar Shimoliy Koreya rasmiylari Kim Chen Inning farzandlari borligini tasdiqlamagan edi. Janubiy Koreya razvedkasi ma’lumotlariga ko‘ra, Kim va uning rafiqasi Li Sol Chjuning 2010, 2013 va 2017-yillarda tug‘ilgan ikki qizi va bir o‘g‘li bor.
Izoh (0)