Janubiy Koreya prezidenti Yun Sok Yol kelasi hafta Markaziy Osiyoning uchta davlati — Turkmaniston, Qozog‘iston va O‘zbekistonga tashrif buyuradi. Bu haqda Korea Times xabar berdi.
Koreya mintaqaning beshta davlati, jumladan, Qirg‘iziston va Tojikiston ishtirokida “Koreya—Markaziy Osiyo” sammitini tashkil etish va 2025-yil Seulda uning yig‘ilishini o‘tkazishni rejalashtirmoqda. Sammit Koreya va Markaziy Osiyo davlatlari bilan hamkorlik uchun yangi platforma yaratishga qaratilgan K-Silk Road tashabbusi doirasida o‘tkazilmoqda.
K-Silk Road tashabbusi Koreyaning Markaziy Osiyo mintaqasi bilan hamkorligini bir pog‘ona yuqoriga oshirish rejasini o‘z ichiga oladi. Tashabbus orqali biz erkin, tinch va farovon Koreya hamda Markaziy Osiyoni ilgari surishda birgalikda harakat qilamiz, — deydi Seul milliy xavfsizlik direktorining birinchi o‘rinbosari Kim Tae Hyo.
Tashabbus hamkorlik to‘rtta asosiy ustunga ega: resurslar, rivojlanishga rasmiy yordam, madaniy va odamlar almashinuvi, hukumat va xususiy darajadagi netvorking. Ushbu ustunlarga asoslanib, Koreya beshta davlatning har biri bilan tegishli sohalarda moslashtirilgan hamkorlikka e’tibor qaratadi.
Masalan, Koreya Qozog‘iston bilan energetika va infratuzilma, Qirg‘iziston bilan suv resurslari va turizm, Turkmaniston bilan energetika stansiyalari bo‘yicha hamkorlikka e’tibor qaratadi.
Ushbu tashabbus tabiiy gaz zaxiralariga, uran, litiy va volfram kabi asosiy foydali qazilmalarga boy mintaqaning strategik ahamiyati ortib borayotganini bildiradi. Shu sababli 2022-yildan beri AQSH, Yevropa Ittifoqi va Germaniya “5+1” sammitlarini o‘tkazmoqda, Rossiya va Xitoy ham Markaziy Osiyo bilan aloqalarini chuqurlashtirmoqda, — deyiladi xabarda.
Tashabbusni amalga oshirish uchun Koreya prezidenti 10—15-iyun kunlari Turkmaniston, Qozog‘iston va O‘zbekistonga davlat tashrifi bilan boradi.
- 10-iyun kuni u Turkmaniston prezidenti Serdar Berdimuhamedov bilan sammit o‘tkazadi, ertasi kuni esa ikki davlat kompaniyalari ishtirok etadigan biznes-forumda qatnashadi.
- Koreya rahbari 11-iyun kuni Qozog‘istonga tashrif buyurib, 12-iyun kuni prezident Qosim-Jo‘mart To‘qayev bilan sammit o‘tkazadi. Davlat rahbarlari, shuningdek, ikki mamlakat kompaniyalari ishtirok etadigan biznes-forumda ishtirok etishni rejalashtirgan.
- 13-iyun kuni siyosatchi O‘zbekistonga keladi va prezident Shavkat Mirziyoyev bilan uchrashadi, 14-iyun kuni esa biznes-forumda ishtirok etadi. Sayohatda unga rafiqasi Kim Keon Hi ham hamrohlik qiladi.
Koreya prezidenti administratsiyasining yuqori martabali vakili Markaziy Osiyo yosh, dinamik demografik tuzilishga egaligini ta’kidlagan.
“AQSH va Xitoy kabi global kuchlar mintaqa bilan aloqalarini mustahkamlashga intilmoqda. Biroq bu mamlakatlar sarmoya va qo‘llab-quvvatlash pozitsiyasida ba’zan o‘zlarini bosim ostida his qilishlari yoki ochiqchasiga aytganda, imperializmning yangi shakliga duchor bo‘lishlari haqida xavotirlar mavjud”, — deyiladi xabarda.
Shu sababli Koreyaning yondashuvi ushbu davlatlar tomonidan olqishlanmoqda. Ularning Koreya bilan hamkorlik qilish istagi infratuzilma, sanoatni rivojlantirish, iqlim va raqamli sa’y-harakatlarni qamrab oladi.
Izoh (0)