Bugungi qahramonlarimiz Koreya dramalaridagi rollari bilan jahon miqyosida mashhurlik va muvaffaqiyatga erishgan. Garchi ayollarning yoshini so‘rash chiroyli odat bo‘lmasa ham, biz ularning bugun necha yoshda ekanligini hamda aktrisalarning tabiiy go‘zallik va yoshlik sirlarini bilishni istadik.
Kim Xi E (56 yoshda)
“Turmush” dramasi tufayli ko‘pchilikka tanilgan Kim Xi E 56 yoshda va u bugungi kunda Janubiy Koreyadagi eng nufuzli drama aktrisalardan biridir. Kim necha yoshga to‘lganini yashirmaydi va qarishdan qo‘rqmaydi. U kosmetik inyeksiyalar va plastik jarrohlik xizmatlaridan umuman foydalanmaydi. Intervyularda aktrisa o‘z husnini tibbiyotga ishonib topshirmasligini bot-bot takrorlaydi. Yoshlik va go‘zallikni saqlab qolish uchun u barvaqt uyquga yotadi, spirtli ichimliklardan o‘zini tiyadi, quyoshda uzoq vaqt qolmaydi, tez-tez yong‘oq iste’mol qiladi va hazm tizimi yaxshi ishlashi uchun marakuyya sharbatini ichadi.
Ko Xyon Jong (53 yoshda)
Ko Xyon Jong 1989-yilda “Koreya go‘zali” tanlovida kumush medalni qo‘lga kiritgandan so‘ng kinoda karyerasini boshladi. Bugungi kunga qadar u 17 ta loyihada, jumladan, “Qum soati”, “Prezident xonim” va “Qirolicha Sondok” kabi dramalarda ishtirok etgan. Xyon Jong 53 yosh bo‘lishiga qaramay, jismonan baquvvat va yosh ko‘rinadi. The Guru Show nashriga bergan intervyusida aktrisa tashqi ko‘rinishiga plastik jarrohlik aralashuviga keskin qarshi ekanligini va faqat massaj hamda terini parvarish qilish muolajalari yordamida yosh ko‘rinishini aytgan. Shuningdek, Xyon Jong qishning qattiq sovuq kunlarida ham isitish tizimini yoqmasligi, batareyalar yuz terisini quritib yuborishini ta’kidlagan.
Su Chjon Xi (63 yoshda)
Aktrisa Su Chjon Xi 63 yoshda ekanligiga kamdan kam odam ishonadi. 80–90-yillarda Suzi va Solxen taxallusi ostida ijod qilgan model, aktrisa va xonanda “Taksi” loyihasida ekranlarga qaytdi va bir necha kun davomida Koreya ijtimoiy tarmoqlarida eng ko‘p muhokama qilinadigan shaxsga aylandi. Chunki san’atga qaytgan 90-yillar aktrisasining yuzida birorta ham ajin ko‘rinmas edi. Su Chjong Xi o‘zining go‘zallik sirlarini oshkor etmaydi.
Ammo aynan balet mashg‘ulotlari uning qomatini chiroyli saqlab qolishda yordam berishini yashirmaydi. Uning treneri aytishicha, “hatto yigirma yoshli qizlar aktrisa bajaradigan harakatlarni qila olmaydi”.
Li Yong E (53 yoshda)
Koreyalik aktrisa Li Yong Eni vatandoshlari “millat yuzi” deb atashadi. O‘z karyerasini 90-yillarda reklama roliklari bilan boshlagan Li keyinchalik ko‘plab muvaffaqiyatli loyihalarda — “Sevgi va nikoh”, “Ota” va boshqa dramalarda ishtirok etdi. Aktrisa 2000-yilda “Birlashgan xavfsizlik hududi” harbiy dramasi va “Saroy javohiri” tarixiy dramasida ishtirok etganidan so‘ng shuhrat qozondi. Uning so‘zlariga ko‘ra, Li Yongning hech qanday go‘zallik sirlari yo‘q:
“Go‘zallik bu — sog‘liq. Salomat va kuchli bo‘lish uchun siz yetarlicha uxlashingiz, xotirjam bo‘lishingiz va ko‘p xayrli amallarni bajarishingiz kerak”, — deydi aktrisa.
Darhaqiqat, aktrisa ko‘plab ezgu ishlarga qo‘l urgan. 1997-yilda yulduz yaxshi niyat elchisi sifatida Efiopiyaga bordi, 2004-yilda u BMTning bolalar jamg‘armasi — YUNISEFga a’zo bo‘ldi. 2017-yilda Li Yong E harbiy mashg‘ulot paytida snaryad portlashi oqibatida halok bo‘lgan ikki yosh askarning onalariga 150 million von (qariyb 110 ming dollar) xayriya qildi.
Kim Song Ryon (57 yoshda)
1988-yilda “Koreya go‘zali” unvoniga sazovor bo‘lgan Kim Song Ryon “Ajdarhoning tirnoqlarini kim ko‘rdi?” filmi orqali kino sanoatiga kirib keldi va 30 yil davomida shu sohada faoliyat olib bordi. Bugungi kunda 57 yoshli Song Ryon ko‘proq drama qahramonlarining onalarini o‘ynaydi. Aktrisaning aytishicha, go‘zal bo‘lish uchun unga muntazam pilates mashg‘ulotlari va massaj yordam beradi. Kim spirtli ichimliklar iste’mol qilmaydi va terining elastikligini saqlab qolish uchun har kuni namlovchi vositalardan bir necha bor foydalanadi.
Om Chon Xva (54 yoshda)
ELLE Korea nashriga bergan intervyusida aytishicha, u bolaligidan aktrisa bo‘lishni istagan, biroq kinoda katta muvaffaqiyatlarga erishishini tasavvur ham qila olmagan. Bugungi kunda 54 yoshli Xva 35 dan ortiq loyihalar ishtirokchisidir. U sog‘lom bo‘lishi va yosh ko‘rinishi uchun doimiy sport bilan shug‘ullanadi, keto parhezga amal qiladi hamda kosmetikadan ko‘p foydalanmaydi.
Izoh (0)