Жанубий Корея пойтахти Сеул шаҳрида йўлнинг қатнов қисмида тўсатдан пайдо бўлган катта ўпирилиш натижасида унга тушиб кетган эркак жасади топилди. Бу ҳақда BBC News хабар бермоқда.
Воқеа Гангдонг туманида содир бўлган. Ҳайдовчи мотоциклда кетаётганида, йўл унинг тагида ўпирилиб кетган. Қутқарувчилар унинг жасадини у тушиб кетган жойдан тахминан 50 метр нарида ер остидан топишган. Бундан олдин унинг мотоцикли ва телефонини топишга муваффақ бўлинган.
Ижтимоий тармоқларда кенг тарқалган ушбу ҳодиса оқибатида автомобиль ҳайдовчиси ҳам жароҳат олган. Машиналардан бирининг видеорегистраторидан олинган тасвирда мотоциклчининг чуқурга тушиб кетгани, унинг олдида кетаётган машинанинг эса ундан зўрға чиқиб олгани акс этганини кўриш мумкин.
Ҳалок бўлган эркакнинг шахси ҳозирча аниқланмаган, унинг ёши тахминан 30 атрофида эканлиги айтилмоқда.
Гангдонг тумани ўт ўчириш бўлими бошлиғи Ким Чанг Сопнинг матбуот анжуманида маълум қилишича, чуқур ичида 2000 тонна тупроқ ва сув аралашмаси бўлган. Ҳокимият вакиллари ҳозирча ўпирилиш сабабини айтишмаган.
Сеул шаҳар ҳокимиятига тақдим этилган ҳисоботда таъкидланишича, сўнгги ўн йил ичида шаҳарда 223 та шундай ўпирилиш юз берган.
Ўпирилишлар ҳосил бўлишининг энг кенг тарқалган сабабларидан бири оҳактош ёки бўр каби тоғ жинсларининг емирилишидир. Инсон фаолияти масалан ер қазиш ишлари, ўпирилишлар ҳосил бўлишини тезлаштириши ёки тупроқнинг шу тарзда чўкишига олиб келиши мумкин.
Изоҳ (0)