Koreya Respublikasi Milliy Assambleyasi deputatlari itlarni go‘shti uchun ko‘paytirish va so‘yishni taqiqlovchi qonun loyihasini ma’qulladi, deb xabar bermoqda Janubiy Koreyaning Yonhap agentligi.
The Korea Times gazetasining yozishicha, qonun loyihasini 208 deputat qo‘llab-quvvatlagan, yana ikki parlamentariy betaraf qolgan. Endi hujjatni prezident imzolashi kerak.
Itni iste’mol uchun ko‘paytirish, so‘yish va go‘shtini sotishni taqiqlash haqidagi qonun 2027-yildan kuchga kirishi kutilmoqda. Yonhap xabariga ko‘ra, taqiqni buzganlik uchun 30 million vongacha (taxminan 22 ming dollar) jarima solinadi, shuningdek, qamoq jazosi ham nazarda tutiladi. Xususan, nasldor itlarning go‘shtini oziq-ovqat sifatida iste’mol qilganlar ikki yilgacha, so‘yganlar esa uch yilgacha ozodlikdan mahrum etilishi mumkin.
Qonun kuchga kirgunga qadar mamlakatda uch yillik imtiyozli davr bo‘ladi, unda hech qanday jazo choralari qo‘llanmaydi. It go‘shtini iste’molga tayyorlovchi korxonalar va odamlar mahalliy hokimiyat organlariga bu sohadan voz kechish rejasini taqdim etsa, ular davlat tomonidan qo‘llab-quvvatlanishi mumkin.
Janubiy Koreyada hukumat statistikasiga ko‘ra, hozirda mamlakatda it go‘shtidan tayyorlangan mahsulotlarni sotuvchi 1150 ga yaqin it fermasi, 34 ta go‘shtni qayta ishlash zavodi, 219 ta distribyutor va 1600 ga yaqin restoran mavjud.
So‘nggi bir necha yil davomida Janubiy Koreyada it go‘shtini taqiqlash g‘oyasi muhokama qilinmoqda. 2023-yil dekabr oyida Seulda joylashgan Hayvonlar farovonligi bo‘yicha xabardorlik, tadqiqot va ta’lim tahlil markazi ikki ming kishi o‘rtasida so‘rov o‘tkazdi. Respondentlarning 94 foizdan ortig‘i bir yil davomida it go‘shti yemaganini, 93 foizga yaqini esa kelajakda it go‘shtini yemoqchi emasligi haqida aytgan. Bundan tashqari, respondentlarning 82 foizdan ortig‘i itlarni oziq-ovqat sifatida iste’mol qilish uchun ko‘paytirish va so‘yishni qonun bilan taqiqlashni qo‘llab-quvvatladi.
Izoh (0)