Shimoliy Koreya hukumati Kim Chen Inning qizini mamlakatning yangi rahbari sifatida ko‘rib, uni rahbarlikka tayyorlamoqda. Bu haqda The Korea Times nashri xabar berdi.
Manbada aytilishicha, shimoldagi koreys davlati rahbariyati Kim Chen Inning qizini rahbarlikka potensial voris sifatida ko‘rgan va uni “buyuk rahbar” sifatida tayyorlashga kirishgan. Nomaʼlum sabablarga ko‘ra Shimoliy Koreya nashrlarida bo‘lg‘usi rahbarning “buyuk shaxsiyati”ni ifoda etuvchi xabarlar tarqala boshlagan.
Shimoliy Koreyaning davlat nashri hisoblangan Rodong Sinmun gazetasi 28-iyul kuni Pxenyandagi issiqxona fermasini ko‘zdan kechirgan Kim Chen In hamda uning qizi Kim Ju E suratlarini eʼlon qilgan. Gazetada mamlakatning ikki eʼtiborli vakili “yetakchi buyuk shaxslar” deya taʼriflangan. Bu taʼrifni ko‘plab Janubiy Koreya nashrlari Shimoliy Koreya yetakchisi o‘zgarishi mumkinligiga ishora sifatida talqin qilgan.
Pxenyan rahbarining qizi yetakchi sifatida tasvirlanishi Shimoliy Koreya uchun yangilik bo‘lib, oldin bunday taʼrif aslo ishlatilmagan. Shimol matbuoti yetakchining qizi haqida jami bo‘lib shu kunga qadar 26 ta manba chop etgan. Ularning 23 tasida Kim Ju E otasi bilan harbiy inshootlarga, yana 3 tasida esa iqtisodiy zonalarga tashrif buyurgan.
Mutaxassislarning taʼkidlashicha, Ju Ening davlat ommaviy axborot vositalarida qayta-qayta ko‘rsatilishi uning Shimoliy Koreya siyosatidagi alohida roli va hokimiyat tepasiga ko‘tarilishi mumkinligini taʼkidlaydi. Vaqti-vaqti bilan Kim Chen In sog‘lig‘i yomonlashgani bilan bog‘liq xabarlar tarqalishi ham so‘nggi yangilikni tasdiqlashi mumkin.
Rodong Sinmun gazetasi, shuningdek, Kim Chen Inning qiziga nisbatan “hyangdo” atamasini qo‘llagan. Bu atama “rahnamo” degan maʼnoni bildirib, faqatgina mamlakat vorislariga nisbatangina qo‘llangan. Bu atama qo‘llanishi odatda bo‘lg‘usi rahbarning mansabga tayinlanishiga oz qolganini bildirgan.
Maʼlumot o‘rnida, Kim Ju E Shimoliy Koreya nashrlarida ilk bor 2022-yil oxirida, otasi bilan birga yangi qitʼalararo ballistik raketani uchirish tadbirida ko‘rinish bergan. O‘shandan beri u otasining ko‘plab jamoat ishlarida, jumladan, harbiy mashg‘ulotlarda qatnashgan. Shimoliy Koreya hukumati dohiyning qiziga ko‘plab rasmiy nomlar bergan. Dastlab u “Suyukli farzand” unvoni bilan taqdirlangan. Keyinchalik bu orden “Hurmatli farzand” unvoniga almashtirilgan. 2023-yilda esa Pxenyandagi kommunistik partiya boshqaruv kengashi Kim Chen Inning qiziga “Tonggi yulduz generali” unvonini bergan.
Izoh (0)