Janubiy Koreya poytaxti Seul shahrida 30-may—1-iyun kunlari Xalqaro fuqaro aviatsiyasi tashkiloti (ICAO)ning Amalga oshirishni qo‘llab-quvvatlash bo‘yicha ikkinchi global simpoziumi bo‘lib o‘tdi, deb xabar bermoqda “Dunyo” axborot agentligi.
Qayd etilishicha, unda aviatsiya tashkiloti bosh kotibi va tashkilotga a’zo davlatlarning transport vazirlari, aviatsiya rahbarlari hamda shu tizim vakillari ishtirok etgan. Tadbirda transport vaziri Ilhom Mahkamov boshchiligidagi O‘zbekiston delegatsiyasi ham qatnashgan.
Simpozium doirasida Ilhom Mahkamov ICAO bosh kotibi Xuan Karlos Salasar bilan uchrashuv o‘tkazgan. Vazir O‘zbekiston tashkilotning atrof-muhitni muhofaza qilish siyosati va amaliyotini qo‘llab-quvvatlashini ta’kidlagan. Ilhom Mahkamov, shuningdek, O‘zbekistonning uglerod chiqindilarini kamaytirishdagi eng samarali hissasi Jet A-1 yarim sintetik (50/50) aviatsiya yonilg‘isi (SSF) ishlab chiqarishni o‘zlashtirish va fuqaro aviatsiyasida chiqindilarni 20 foizga kamaytirishdan iboratligini bildirgan. O‘zbekiston transport vaziri kelajakda Uzbekistan GTL tomonidan ishlab chiqarilgan to‘liq sintetik aviatsiya yonilg‘isiga o‘tish rejalashtirilganini ham ma’lum qilgan.
Uchrashuv yakunida 5—6-iyun kunlari Samarqand shahrida ICAO ishchi guruhining “Til bo‘yicha professional talablarni joriy etish” 42-sessiyasini o‘tkazish rejalashtirilgani ma’lum qilingan.
Ilhom Mahkamov Singapur transport vaziri Amiy Xor bilan ham uchrashuv o‘tkazgan. Uning doirasida tomonlar O‘zbekiston aeroportlarini rivojlantirish sohasidagi Changi Airports International Pte kompaniyasi bilan hamkorlik va PSA International kompaniyasi bilan O‘zbekiston hududida zamonaviy konteyner terminalini tashkil etish masalalarini muhokama qilgan.
Konteyner terminali — yuk konteynerlari to‘planadigan, keyingi manzilga yuborishgacha bir joyga yig‘iladigan obyekt. Terminallar kemalar hamda quruqlikdagi transport vositalari uchun tashkil etilgan bo‘lishi mumkin.
Vazirlar Singapur tajribasi asosida O‘zbekistonda yerosti metro liniyalarini loyihalash va qurish muhimligini ta’kidlagan. Shuningdek, ikki mamlakat o‘rtasidagi hamkorlik o‘z ichiga transport tizimini aqlli boshqarish markazi va Singapur tajribasini joriy etishni ham olishi qayd etilgan.
Forum doirasida Indoneziya transport vaziri Budi Karya Sumadi, Hyundai Motor Group, Korea Airports va Incheon aeroportlari vakillari bilan ikki tomonlama uchrashuvlar o‘tkazilgan.