Janubiy Koreyada noqonuniy yurgan o‘zbekistonliklar uchun “yashil yo‘lak” orqali mamlakatdan chiqib ketish muddati 2025-yilning 31-yanvarigacha uzaytirildi. Bu haqda Migratsiya agentligi xabar berdi.
Agentlikning Seuldagi vakolatxonasi va Koreya Adliya vazirligi o‘rtasida o‘tkazilgan muzokaralar natijasida imzolangan hujjatga ko‘ra, 30-noyabr kuni tugashi lozim bo‘lgan “yashil yo‘lak” loyihasi 2025-yilning 31-yanvargacha uzaytirildi. Ushbu mamlakatda noqonuniy yurgan o‘zbekistonliklar shu sanaga qadar “yashil yo‘lak”dan foydalanib erkin chiqib ketishi mumkin.
Koreyada noqonuniy ishlab, yashab yurgan shaxslar quyidagi miqdorda jarima to‘laydi:
- 1 oydan kam bo‘lsa 1,000,000 von (716 dollar);
- 1 oydan 3 oygacha 1,500,000 (1 074 dollar);
- 3 oydan 6 oygacha 2,000,000 (1 432 dollar);
- 6 oydan 1 yilgacha 4,000,000 (2 864 dollar);
- 1 yildan 2 yilgacha 7,000,000 (5 012 dollar);
- 2 yildan 3 yilgacha 10,000,000 (7 160 dollar);
- 3 yildan 5 yilgacha 20,000,000 (14 321 dollar);
- 5 yildan 7 yilgacha 25,000,000 (17 902 dollar);
- 7 yildan ko‘p bo‘lsa 30,000,000 (21 482 dollar).
“Ko‘rsatilgan muddat ichida Koreyani ixtiyoriy tark etsangiz yuqoridagi jarimalardan ozod etilasiz, keyinchalik Koreyaga qayta kirishingiz yengillashadi”, deyiladi xabarda.
Qayd etilishicha, ushbu muddat tugaganidan so‘ng fuqaro Koreyada yana qoladigan bo‘lsa, Migratsiya agentligi tomonidan shartnoma bandlariga ko‘ra fuqaro yoki uning kafiliga nisbatan katta miqdorda jarima; (har bir oyi uchun 2000 dollar), Koreya tomonidan qayta kirishga taqiq qo‘llaniladi.
Shu sababli Vazirlar Mahkamasi huzuridagi Migratsiya agentligi Koreyada faoliyat yuritayotgan fuqarolardan ushbu davlatning qonunchiligini buzmaslikni, yuqorida ko‘rsatilgan muddat ichida O‘zbekistonga qaytishlarini so‘radi.
Janubiy Koreyadagi o‘zbekistonliklar soni qancha?
Koreya Respublikasi immigratsiya xizmati ma’lumotiga ko‘ra, hozirgi vaqtda 92 000 nafar o‘zbekistonlik qonuniy va 9000 nafar o‘zbekistonlik esa noqonuniy tarzda ushbu davlat hududida bo‘lib turibdi. Koreya Respublikasi Adliya vazirligiga ko‘ra, agar bir davlat fuqarolarining 10 foizidan ortiq qismi noqonuniy statusda bo‘lsa, o‘sha davlat fuqarolariga viza cheklovlari joriy etilishi mumkin.
So‘nggi ma’lumotlarga ko‘ra, Janubiy Koreyada noqonuniy migrantlar 410 mingdan oshgan. Mamlakatda jami 2,6 million xorijlik borligi inobatga olinsa, taxminan har oltinchi migrant noqonuniy hisoblanadi. Noqonuniy migrantlarning 145 mingdan ortig‘ini tailandliklar, 15 mingga yaqinini xitoyliklar, 10 mingdan ortig‘ini qozog‘istonliklar tashkil etadi.
Izoh (0)