Huquqni muhofaza qiluvchi organlar tomonidan o‘tkazilgan tezkor tadbirlarda jami 111 kg narkotik modda musodara qilindi.
Maʼlum qilinishicha, Samarqand viloyatida Tojikistonning So‘g‘d viloyati, Panjikent tumanidan aylanma yo‘llar orqali 10 kg 894 gramm opiy moddasini Urgut tumani hududiga olib kelgan Tojikiston fuqarolari – 1980, 1982, 1989-yillarda tug‘ilgan 3 nafar aka-uka ushlandi.
Shuningdek, ularning jinoiy sherigi bo‘lgan, Urgut tumanida istiqomat qiluvchi, 1982-y.t. ayol ham ushlangan. Uning yashash xonadonida saqlanayotgan 13 kg 85 gramm opiy moddasi protsessual tartibda rasmiylashtirib olindi.
Hozirda mazkur shaxslarga nisbatan jinoyat ishi qo‘zg‘atilib, qamoq ehtiyot chorasi qo‘llanildi.
Shu bilan birga, o‘zbek-tojik davlat chegarasining Toshkent viloyati, Bekobod tumani, “Turon” MFY hududidan o‘tuvchi qismida Tojikistonning So‘g‘d viloyati, Mastchox tumanidan Bekobodga oqib o‘tuvchi Dalvarzin kanali orqali 3 dona yelim idish oqizib yuborilgan. Idishda jami 8 kg 381 gramm opiy va 59 kg 296 gramm gashish moddalari borligi aniqlandi.
Ushbu giyohvandlik vositalarini qabul qilib olish maqsadida chegara hududiga kelgan vaqtlarida Bekobod shahri va tumanida istiqomat qiluvchi, 1985, 1989, 1996 va 1997-yillarda tug‘ilgan 4 nafar fuqaro qo‘lga olindi. Ulardan 2 nafari muqaddam sudlangan shaxslar hisoblanadi.
Hozirda ularga nisbatan Jinoyat kodeksining 246-moddasi 2-qismi (yadroviy, kimyoviy, biologik va ommaviy qirg‘in qurolining boshqa turlarini, shunday qurollarni yaratishda foydalanilishi mumkinligi ayon bo‘lgan material va moslamalarni, radioaktiv materiallarni, shuningdek giyohvandlik vositalari, ularning analoglari yoki psixotrop moddalarni ko‘p miqdorda kontrabanda qilish) va 273-moddasi 5-qismi (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atilib, qamoq ehtiyot chorasi qo‘llanildi.
Bundan tashqari, Bekobod tumanida o‘zbek-tojik davlat chegarasidan taxminan 400-500 metr uzoqlikdagi dala maydonida muqaddam nomaʼlum shaxslar tomonidan qoldirib ketilgan 1 dona sport sumkasi ichida 3 kg 942 gramm opiy va 15 kg 473 gramm gashish moddalari borligi aniqlandi.
Hozirda holat yuzasidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atildi.
Hozirda giyohvandlik vositalarini qoldirib ketgan shaxslarni aniqlash bo‘yicha zarur chora-tadbirlar amalga oshirilmoqda.
Izoh (0)