Республика божхоначилари йил бошидан буён 790 кг дан зиёд гиёҳвандлик воситаларининг ноқонуний муомаласига чек қўйди. Бу ҳақда Божхона қўмитаси матбуот хизмати хабар берди.
Маълум қилинишича, Чилонзор туманида олдиндан кузатувга олинган шахс бошқарувидаги автомашина тўхтатилиб, белгиланган тартибда кўздан кечирилди.
Натижада машинадаги ҳайдовчи ва йўловчининг чўнтагидан полиэтилен ўрамларда жами 165 грамм оғирликдаги “опий” гиёҳвандлик воситаси борлиги аниқланди.
Шунингдек, Яшнобод туманидаги офислардан бирида 953 грамм оғирликдаги “гашиш” ва уларни ўлчашда фойдаланилган электрон тарози борлиги аниқланди.
Шу билан бирга, Сурхондарё вилояти, “Айритом” чегара божхона постида қўшни давлатдан кириб келган юк машинасини божхона кўригидан ўтказиш давомида ҳайдовчи автотранспорт кабинасидаги орқа ўриндиқ остида 37 грамм “гашиш” гиёҳвандлик воситасини яшириб қўйганлиги фош бўлди.
Маълумот учун божхоначилар йил бошидан буён аниқланган 108 та қонунбузилиши ҳолатларида 790 кг дан зиёд оғирликдаги гиёҳванд моддаларнинг олиб кирилиши ва ички ҳудуддаги айланмасига чек қўйган.
Ҳозирда ҳолатлар юзасидан божхона органлари томонидан жиноят ишлари қўзғатилди.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)