Gvatemala xavfsizlik xodimlari migrantlar, shu jumladan, o‘zbekistonlik muhojirlar kontrabandasi bilan shug‘ullanuvchi jinoiy guruhga aloqador 25 nafar politsiya xodimini hibsga oldi. Bu haqda Reuters xabar bermoqda.
Gvatemala o‘nlab yillar davomida Lotin Amerikasi va boshqa mamlakatlardan kelib, Meksika bilan AQSH chegarasiga yo‘l olgan noqonuniy migrantlar uchun asosiy tranzit mamlakat hisoblanadi. Mamlakat rasmiylarining aytishicha, guruh bir necha yil faoliyat yuritib, mahalliy valyutada millionlab daromad olgan.
“Ushbu guruh mamlakat bo‘ylab olib o‘tilayotgan noqonuniy migrantlar xavfsizligini ta’minlash uchun pora berish orqali politsiya xodimlaridan foydalangan”, degan Gvatemala ichki ishlar vaziri Fransisko Ximenes.
Mamlakat Ichki ishlar vazirligi ma’lumotlariga ko‘ra, Gvatemala orqali 10 nafar o‘zbekistonlik migrantni noqonuniy olib o‘tayotgan ikki shaxs qo‘lga olingan. Bu holatning tergovi yakunda guruhni yo‘q qilishga olib kelgan. Jinoiy guruhdan to‘rtta avtomobil, o‘qotar qurol va naqd pullar musodara qilingan.
Avvalroq AQSH chegara xizmati 2024-yilda Kanada chegarasidagi Suonton hududida 19 mingdan ortiq hujjatsiz migrantni hibsga olgani haqida xabar berilgan edi.
Izoh (0)