Россия ва Доминикан Республикасидан бўлган беш нафар муҳожир Пуэрто Рико ғарбий қирғоқларига қайиқда етиб боришга уринган пайтда қўлга олинди. Бу ҳақда АҚШ чегара божхона хизмати хабар берди.
Маълум қилинишича, 28 февраль куни Реми станцияси чегара патрул хизмати ходимлари навигация чироқларисиз ҳаракатланаётган қайиқни аниқлаган. Божхоначилар полициянинг денгиз бўлинмаси билан боғланиб, ҳуқуқ-тартибот идоралари ходимлари билан бирга қайиқ олдигача сузиб борган.
Кемада беш нафар хорижлик — уч нафар Доминикан республикаси фуқароси ва икки нафар россиялик, бир эркак ва бир аёл бўлган.
Ушбу ҳолат ноқонуний киришнинг олдини олиш ва иммиграция қонунчилигининг такрорий бузилишига қарши курашда биз дуч келаётган долзарб муаммоларни кўрсатади, деди бош патрул Реми Режи Жонсон.
Биометрик текширув шуни кўрсатдики, Доминикан республикасидан келган муҳожирлардан бири илгари содир этган жиноятлари учун депортация қилинган. Россия фуқаролари эса кейинги тергов ва депортация учун АҚШ Ички хавфсизлик вазирлигига топширилди.
Эслатиб ўтамиз, 21 январь куни президент Дональд Трамп инаугурация нутқида АҚШ ва Мексика чегарасида фавқулодда ҳолат эълон қилишини ва ноқонуний миграцияни тўхтатиш учун армиядан фойдаланишини маълум қилганди.
Январь ойи охирида АҚШ иммиграция ва божхона полицияси фуқаролари АҚШ ҳудудида ноқонуний бўлиб турган ва депортация қилиниши керак бўлган давлатлар рўйхатини эълон қилди. Унда 970 дан ортиқ Ўзбекистон фуқаролари бор. Умумий ҳисобда, турли давлатлардан 1 445 549 нафар чет эл фуқароси чиқариб юборилади.
Депортация қилинадиганлар орасида Мексика (252 044), Гватемала (253 413), Гондурас (261 651) ва Эл-Салвадор (203 822 киши) еткачилик қилмоқда
Ўзбекистоннинг Вашингтондаги элчихонаси ва мамлакатнинг Нью Йоркдаги Бош консулхонаси узоқ йиллардан буён Ўзбекистон фуқароларининг ўз ватанларига хавфсиз депортациясини таъминлаш мақсадида АҚШнинг тегишли ҳуқуқ-тартибот идоралари билан яқиндан ҳамкорлик қилиб келмоқда.
Ўзаро келишувларга асосан, Америка томони депортация қилинадиган фуқароларининг ҳар бир ҳолати ҳақида тезкорлик билан хабардор қилади. Ўрнатилган амалиётга кўра, фуқаролар ватанга Нью Йорк—Тошкент йўналиши орқали қайтади. Шунга кўра, АҚШдан депортация қилинган 7 нафар ўзбекистонлик ватанга қайтарилди, яна 10 нафари шу ҳафта қайтарилиши кутилмоқда.
Изоҳ (0)