Qo‘shma Shtatlar moliya vaziri Skott Bessent AQSHda Rossiyaga nisbatan sanksiyalar rejimini yumshatish yoki kuchaytirish imkoniyati ko‘rib chiqilayotganini ma’lum qildi.
Sanksiyalar rejimi u yoki bu tomonga “tartibga solinishi” mumkinmi, degan savolga javoban, vazir bu voqealarning ehtimoliy rivojlanishining juda “yaxshi talqini” ekanligini aytdi. Uning qo‘shimcha qilishicha, prezident Tramp “mojaro tezroq yakunlanishiga to‘liq sodiq”.
Ketma-ketlik shunday: ukrainaliklarni iqtisodiy aloqalar orqali AQSHga yaqinlashtirish, Amerika xalqini, Amerika jamoatchiligini ishontirish, ularni o‘z tomoniga og‘dirish, deya Bessentning so‘zlaridan iqtibos keltiradi Bloomberg.
Uning qo‘shimcha qilishicha, shundan so‘ng ruslarni muzokaralar stoliga chorlab, agar kerak bo‘lsa, sanksiyalarni kuchaytirish haqida aytish mumkin. Bessentning so‘zlariga ko‘ra, AQSHning Ukrainadagi jiddiy iqtisodiy manfaatlari uning uchun “xavfsizlik qalqoni” bo‘ladi.
Intervyuda vazir Zelenskiyning “Tramp Ukraina atrofidagi vaziyat to‘g‘risida noto‘g‘ri ma’lumotga ega” ekanligi haqidagi bayonotlarini “o‘ta noo‘rin” deb atadi va AQSH yetakchisining Ukrainada saylovlar o‘tkazish zarurligi haqidagi fikrini takrorladi.
Ehtimol, Ukraina demokratik jarayonda oldinga siljishi kerak, dedi u.
“Rossiya Ukraina bo‘yicha muzokaralar stoliga qaytishga tayyor” — Putin
Rossiya yetakchisining so‘zlariga ko‘ra, Ukraina Ar-Riyodda Rossiya va AQSH delegatsiyalari uchrashuvida ishtirok etmagani uchun “vahimaga tushishga” asos yo‘q, chunki Kiyevni hech kim muzokaralar jarayonidan chetlatmayapti.
Rossiya hech qachon Ukraina bilan muzokaralar jarayonidan bosh tortmagan. Aksincha, hamkorlarimiz muzokaralarni rad etdi, yevropaliklar Rossiya bilan aloqani to‘xtatdi, Ukraina tomoni esa o‘ziga muzokaralar olib borishni taqiqladi, Istanbuldagi muzokaralar jarayonidan chiqdi va buni ochiqchasiga e’lon qildi, dedi Putin jurnalistlarga.
Rossiya yetakchisining aniqlik kiritishicha, Donald Tramp telefon orqali muloqot chog‘ida muzokaralar jarayoni Rossiya va Ukraina ishtirokida o‘tishini ta’kidlagan.
Putinga ko‘ra, u Donald Trampga Rossiya–Ukraina mojarosini qisqa vaqt ichida hal qilishning iloji yo‘qligi haqida aytgan, Amerika prezidenti esa bu borada ko‘proq ma’lumot olgach, “o‘z pozitsiyasini o‘zgartirgan”.
Ha, olti oy kerakligini aytdim. Hozir muddatlar haqida gapirmaymiz. Lekin bu tabiiy, bu yerda aytarli hech narsa yo‘q, deb tushuntirdi Putin.
Izoh (0)