Qo‘shma Shtatlar Rossiya va xorijdagi 400 nafar shaxs va yuridik shaxslarga nisbatan sanksiyalar joriy qildi, deya AQSH Moliya vazirligi xabar berdi.
AQSH Moliya vazirligi va Davlat departamenti Rossiyada va xorijda, jumladan, Osiyo, Yevropa va Yaqin Sharqda Rossiyaning harbiy sa’y-harakatlarini qo‘llab-quvvatlash va sanksiyalarni chetlab o‘tish imkonini beruvchi tovar va xizmatlar ishlab chiqaradigan 400 ga yaqin jismoniy va yuridik shaxslarga nisbatan sanksiya qo‘llamoqda, deyiladi bayonotda.
Oq uyning aniqlik kiritishicha, yangi paket Ukrainaning yaqinlashib kelayotgan Mustaqillik kuniga to‘g‘ri keladi. Shuningdek, cheklovlar Rossiya uchun qurol-yarog‘ va mudofaa mahsulotlari xarid qilish bilan shug‘ullanuvchi kompaniyalarga, sanksiyalarni chetlab o‘tish, sanksiyalangan oltin qazib olish va oltin sotishdan tushgan daromadlarni yuvish sxemalari ishtirokchilariga, shuningdek, ko‘mir qazib olish kompaniyalariga qaratilgan.
AQSH prezidenti ma’muriyati ushbu kiritilgan sanksiyalar “Rossiyaning metall va tog‘-kon sanoatidan keladigan daromadlarini yanada cheklashini” aytgan.
Bundan tashqari, Amerika sanksiyalari Rossiya, Belarus, Italiya, Shveysariya, Avstriya, Xitoy va Turkiya fuqaroligiga ega bo‘lgan shaxslarga ta’sir ko‘rsatdi. Hammasi bo‘lib SDN ro‘yxatiga 50 ga yaqin kishi kiritilgan. Ular orasida Rossiya mudofaa vaziri Andrey Belousovning o‘g‘li Pavel Belousov ham bor.
Izoh (0)