AQSH moliya vaziri Janet Yellen Xitoy Davlat kengashi bosh vaziri o‘rinbosari Xe Lifeng bilan virtual uchrashuv o‘tkazdi.
Muloqot chog‘ida Yellen Pekinga Rossiyaga yordami uchun tegishli oqibatlar bilan tahdid qildi.
“Janet Yellen agar Pekin Moskvani Ukrainaga qarshi urushda moddiy qo‘llab-quvvatlasa, Xitoyda joylashgan kompaniyalar ham jiddiy oqibatlarga duch kelishini ta’kidladi”, deyiladi vazirlik xabarida.
Bundan tashqari, Yellen “XXR hukumati homiyligida kibermakondagi subyektlarning zararli faoliyati”dan xavotir bildirgan. Shuningdek, u “Xitoyning bozordan tashqari siyosatiga” qarshi chiqqan.
2024-yilning noyabr oyida Bloomberg agentligi G7 va Yevropa ittifoqi Xitoyga nisbatan, shu jumladan “Rossiyaga harbiy yordam ko‘rsatgani” uchun cheklov choralarini joriy etish rejalarini e’lon qilgandi. Xitoy maqolaga izoh berar ekan, Yevropa ittifoqi ikki tomonlama standartlarni qo‘llayotganini aytgan.
Avvalroq AQSH Savdo vazirligi milliy xavfsizlik nuqtai nazaridan Xitoy dronlarini AQSHda cheklash yoki taqiqlashga olib kelishi mumkin bo‘lgan yangi qoidalarni ko‘rib chiqayotganini ma’lum qilgan edi.
Vazirlik ma’lumotiga ko‘ra, Xitoy va Rossiya tahdidlari “raqiblarga ushbu qurilmalarga masofadan kirish va manipulyatsiya qilish imkoniyatini berishi mumkin, bu esa AQSHning maxfiy ma’lumotlarini xavf ostiga qo‘yadi”.
AQSHda sotiladigan tijorat dronlarining aksariyati Xitoyda ishlab chiqarilgan.
2024-yilning sentyabr oyida AQSH savdo vaziri Jina Raymondo vazirlik avvalroq taklif qilingan Xitoy transport vositalarini AQSHda amalda taqiqlashga o‘xshash cheklovlar kiritishi mumkinligini aytgan edi. Bunda asosiy e’tibor Xitoy va Rossiya uskunalari, chiplari va dasturiy ta’minotiga ega dronlarga qaratiladi.
Raymondo 20-yanvarga qadar Xitoy avtomobillariga nisbatan qoidalarni ishlab chiqish yakunlanishiga umid bildirgan. Xitoy dronlarini cheklash yoki taqiqlash to‘g‘risidagi qarorni 20-yanvar kuni lavozimga kirishayotgan bo‘lajak prezident Donald Tramp ma’muriyati qabul qiladi. So‘nggi bir yil ichida AQSH Xitoy dronlariga qarshi bir qator choralar ko‘rdi. Xususan, Jo Bayden dekabr oyida Xitoyning DJI va Autel Robotics kompaniyalari tomonidan ishlab chiqarilgan yangi dron modellarini sotishni taqiqlovchi qonunni imzolagan.
Izoh (0)