Yevropa ittifoqi Rossiyadagi 2 mingdan ortiq shaxs va tashkilotlarga nisbatan sanksiyalarni kelasi yilning 15-martigacha uzaytirdi. Bu haqda Yevropa ittifoqi kengashi bayonotida ma’lum qilindi.
“Bugun Yevropa ittifoqi kengashi Ukrainaning hududiy yaxlitligi, suvereniteti va mustaqilligiga putur yetkazgan yoki unga tahdid solgan shaxslarga nisbatan cheklov choralarini yana olti oyga, 2025-yil 15-martgacha uzaytirishga qaror qildi”, deyiladi hujjatda.
Yevropa ittifoqining mazkur sanksiyalari 2014-yildan beri amal qiladi. Avvalroq Amerika Qo‘shma Shtatlari Rossiyadagi 400 nafar jismoniy va yuridik shaxslarga nisbatan sanksiyalar joriy qilgani xabar berilgandi.
“AQSH Moliya vazirligi va davlat departamenti Rossiyada va xorijda, jumladan, Osiyo, Yevropa va Yaqin Sharqda Rossiyaning harbiy sa’y-harakatlarini qo‘llab-quvvatlash, shuningdek, sanksiyalarni chetlab o‘tish imkonini beruvchi tovar va xizmatlar ishlab chiqaradigan 400 ga yaqin jismoniy va yuridik shaxslarga nisbatan sanksiya qo‘llamoqda”, deyiladi bayonotda.
Amerika sanksiyalari Rossiya, Belarus, Italiya, Shveysariya, Avstriya, Xitoy va Turkiya fuqaroligiga ega bo‘lgan shaxslarga ta’sir ko‘rsatadi.
Izoh (0)