AQSH mudofaa vaziri Pit Xegset mudofaa byudjetini keyingi besh yil ichida har yili 8 foizga yoki jami 40 foizga qisqartirish rejasini ishlab chiqishni buyurdi. Bu haqda Washington Post xabar berdi.
Xarajatlarni qisqartirish rejasi 24-fevralgacha taqdim etilishi kerak. Prezident Donald Tramp ma’muriyati qisqartirilmaydigan 17 ta yo‘nalishni belgilab bergan. Bunga AQShning janubiy chegarasini himoya qilish operatsiyalari, yadroviy arsenal va raketaga qarshi mudofaa tizimlarini modernizatsiya qilish, kamikadze dronlari, suv osti kemalari va o‘q-dorilarni sotib olish kiradi.
Ukrainani Rossiya bilan urushda qo‘llab-quvvatlashda muhim rol o‘ynaydigan Yevropa qo‘mondonligi, Yaqin Sharqdagi operatsiyalarni boshqaradigan Markaziy qo‘mondonlik va qit’adagi bir necha ming amerikalik askarlarni boshqaradigan Afrika qo‘mondonligi uchun joriy moliyalashtirish darajasini saqlab qolish haqida gapirilmagan.
AQSH mudofaa budjeti 2025-yilda qariyb 850 milliard dollarni tashkil etadi. Xegset reja amalga oshsa, bu Pentagon uchun 2013-yildan beri eng yirik xarajatlarni qisqartirish bo‘lishini aytmoqda. Pentagonning yuqori martabali amaldorlari yaqin yilda AQSH byudjetida 50 milliard dollar tejalgan mablag‘ qolishini prognoz qilgan. Bu mablag‘lar Isroilnikiga “Temir gumbaz” mudofaa tizimini yaratish uchun sarflanishi mumkin.
Tramp Isroildagi kabi “Temir gumbaz” yaratishni buyurdi
“Qalqon”ni ishlab chiqish Trampning saylovoldi va’dalaridan biri edi. Mudofaa tizimlarini to‘liq AQSHda ishlab chiqarish rejalashtirilgan. Bunda yetakchi rolni temir rudasi qazib olishda peshqadam bo‘lgan Minnesota shtati o‘ynashi mumkin.
Tramp AQSHning “ballistik, qanotli va gipertovushli raketalar” tomonidan “halokatli tahdid”ga duch kelayotganini aytgandi. Biroq, AQSH (3 800 000 kvadrat mil) kabi katta mamlakatni himoya qilishga qodir bo‘lgan har qanday qalqon, maydoni 8630 kvadrat mil bo‘lgan Isroil tizimidan ancha kattaroq bo‘lishi aniq. Ko‘plab harbiy ekspertlar bunday miqyosdagi “Temir gumbaz” samarasiz bo‘lishi va juda qimmatga tushishi haqida ogohlantirmoqda.
Izoh (0)