AQSH hukumati 12-iyun kuni Rossiyaga qarshi sanksiyalar paketini kengaytirdi. Bu haqda Vashingtondagi hukumat manbalariga tayanib, VOA News xabar berdi.
Manbada aytilishicha, Oq Uy Rossiyaning 300 dan ortiq yangi tashkilotlari va davlat mansabdorlariga sanksiya va cheklovlar kiritgan. Ushbu tashkilot va subyektlar Rossiyaga urush harakatlarini davom ettirishga yordam beradigan mahsulot va xizmatlar ko‘rsatishda, shuningdek, sanksiyalar oqibatlaridan qochishga yordam berishda ayblangan.
Sanksiyalar paketi AQSH Moliya vazirligi tomonidan eʼlon qilingan. Cheklovga tushgan kompaniyalar Rossiya bilan bir qatorda Xitoy, Turkiya, shuningdek, Birlashgan Arab Amirliklarida ham joylashgan.
“Rossiyaning urush iqtisodiyoti xalqaro moliya tizimidan chuqur izolyatsiya qilingan. Kreml armiyasi tashqi dunyoga chiqishdan uzib qo‘yilgan. Bugungi sanksiyalar Rossiya uchun xalqaro xomashyo va texnikaga erishish uchun uchinchi dunyo mamlakatlariga tayanish imkoniyatlarini yo‘qqa chiqaradi”, — degan AQSH G‘aznachilik kotibi Janet Yellen.
Maʼlumotlarga ko‘ra, Ukraina urushi boshlanganidan beri Qo‘shma Shtatlar Rossiyaning 4000 dan ortiq tijorat kompaniyalari va jismoniy shaxslariga qarshi sanksiyalar kiritdi. Ushbu harakatlar Rossiyada ishlab chiqarishni butunlay to‘xtatish va iqtisodiyotda salbiy o‘zgarishga erishish edi.
Izoh (0)