NATO bosh kotibi Mark Ryutte G‘arb davlatlari Ukrainaga Rossiya bilan “mojaroning trayektoriyasi”ni o‘zgartirishga yetadigan hajmda yordam ko‘rsatishi kerakligini aytdi.
Bunday yondashuv Yevropa, AQSH, shuningdek, Hind—Tinch okeani mintaqasi mamlakatlari manfaatlariga mos keladi, deb hisoblaydi Shimoliy Atlantika alyansi rahbari.
Mark Ryutte Fransiya prezidenti Emmanuel Makron bilan qo‘shma matbuot anjumanida Ukrainani og‘ir qish mavsumi kutayotganini ta’kidladi.
“Biz birgalikda Ukrainaning jangovar qobiliyatini saqlab qolishdan ko‘ra ko‘proq natijaga erishishimiz kerak. Ukrainaliklar 2022-yildan beri eng qattiq bo‘lishi kutilayotgan qishga tayyorlanar ekan, ularni doimiy qo‘llab-quvvatlashda davom etishimiz zarurati haqida muhokama qilamiz. Tanlagan yo‘nalishimizda uzoq muddat sodiq qolishimizni tasdiqlashimiz kerak”, dedi NATO bosh kotibi.
Mark Ryutte va Makronning ilk uchrashuvi
Joriy yil 12-noyabr kuni Yelisey saroyida Emmanuel Makron va 1-oktyabrda lavozimiga kirishgan NATOning yangi bosh kotibi o‘rtasida birinchi uchrashuv bo‘lib o‘tdi.
OAV yozganidek, asosiy mavzu Donald Trampning AQSH prezidenti etib saylanishi fonida Ukrainaga yordam ko‘rsatishni davom ettirish bo‘ladi.
Avvalroq Rossiya rasmiylari Ukrainadagi jangovar harakatlar dinamikasini G‘arb qurollari bilan o‘zgartirib bo‘lmasligini ta’kidlagandi.
NATOning yangi qo‘mondonligi
Oktyabr oyida NATO bosh kotibi Mark Ryutte Alyansning yangi qo‘mondonligi Ukrainadagi mojaroning borishiga ta’sir o‘tkaza olishini aytgandi. Bu haqda u Ukraina harbiylarini Xavfsizlikka ko‘maklashish va tayyorlash bo‘yicha alyansning yangi qo‘mondonligiga (NSATU) tashrif buyurganida gapirib o‘tgan.
Mazkur qo‘mondonlikni yaratish to‘g‘risidagi qaror iyul oyida bo‘lib o‘tgan NATO sammitidan so‘ng qabul qilingan. Bungacha qurol-yarog‘ yetkazib berishni muvofiqlashtirish AQSH moliya vazirligi boshchiligidagi guruh tomonidan amalga oshirilayotgandi.
Izoh (0)