Ukraina tashqi ishlar vaziri Andrey Sibiga Yevropa davlatlari va AQSHni mamlakatni faolroq qo‘llab-quvvatlashga chaqirdi. Hozirda bu boradagi sustkashlik yomon oqibatlarga olib kelishi mumkinligidan ogohlantirdi.
Bu haqda Sibiga X ijtimoiy tarmog‘ida yozdi.
“Hozir Ukrainaning sheriklari uchun charchoq yoki dam olish vaqti emas”, dedi vazir.
Sibiga tinchlikka erishish uchun Ukrainani ko‘proq qo‘llab-quvvatlash zarurligini ta’kidladi.
Ukraina Moliya vazirligi 2024-yilda Kiyev G‘arb davlatlaridan 41,7 milliard dollar miqdorida yordam olganini ma’lum qilgandi.
Ukraina moliya vaziri Sergey Marchenko ushbu mablag‘lar asosiy ijtimoiy xarajatlarni qoplash, jumladan, pensiyalar, ta’lim va tibbiyot xodimlarining maoshlarini to‘lash, shuningdek, aholini ijtimoiy himoya qilish dasturini ta’minlashga yordam berganini ta’kidladi.
Avvalroq Ukraina prezidenti Vladimir Zelenskiy Rossiyaga hududiy yon bosish shartini aytgandi.
Unga ko‘ra, Ukraina Rossiya tomonidan bosib olingan hududlardan voz kechish evaziga NATOga qo‘shilish ssenariysini ko‘rib chiqishi mumkin.
“NATO Ukrainaga qonuniy ravishda taklif qilinmoqda va biz Ukrainaning boshqa hududlarini tan olmasak-da, NATO Ukraina nazoratidagi qismda faoliyat yuritishi mumkin. Bu haqda kelishib olsa bo‘ladi. Bunga ishonchim komil”, dedi Zelenskiy amerikalik podkaster Leks Fridmanga bergan intervyusida.
Izoh (0)