Ukraina prezidenti Vladimir Zelenskiy o‘zining past reytingiga qaramay, saylovlar o‘tkazishdan bosh tortmoqda, deb yozdi AQSH prezidenti Donald Tramp Truth Social ijtimoiy tarmog‘ida.
Tramp, shuningdek, ukrainalik hamkasbini “diktator” deb atadi.
Saylovsiz diktator. Zelenskiy tezroq harakat qilishi kerak, aks holda uning mamlakati butkul tamom bo‘ladi. Biz Rossiya bilan urushni tugatish bo‘yicha muzokaralarni muvaffaqiyatli olib bormoqdamiz. Buni faqat Tramp va uning ma’muriyati uddalay olishini barcha e’tirof etdi, deydi AQSH yetakchisi.
U “Ukrainani yaxshi ko‘rishi, biroq Zelenskiy juda yomon ish qilgani sababli uning mamlakati vayron bo‘lgani va millionlab odamlar sababsiz halok bo‘lgani”ni qo‘shimcha qildi.
Trampning ta’kidlashicha, Zelenskiy AQSHni “hech qachon boshlanmasligi kerak bo‘lgan, g‘alaba qozonib bo‘lmaydigan urush uchun” 350 milliard dollar ajratishga ko‘ndira olgan.
Amerika rahbarining aniqlik kiritishicha, ushbu summa Yevropa Ukraina uchun sarflagan miqdordan 200 milliard dollarga ko‘p hamda Zelenskiy AQSHdan olingan mablag‘ning yarmi yo‘qolganini tan olgan.
Avvalroq Ukraina prezidenti Vashington Kiyevga go‘yoki 500 milliard dollarlik yordam bergani haqidagi ma’lumotlar haqiqatga to‘g‘ri kelmasligini aytgan edi.
Bizda butunlay boshqa raqamlar mavjud. Bizda hamma narsa juda aniq. Urush bizga 320 milliard dollarga tushdi. 120 milliard — bu biz, Ukraina xalqi, soliq to‘lovchilar. 200 milliard — bu AQSH va Yevropa ittifoqdoshlari. Bu qurol-yarog‘ to‘plamlari. AQSH bizga taxminan 67 milliard dollarlik qurol-yarog‘ va 31,5 milliard dollarni byudjetga to‘g‘ridan to‘g‘ri moliyaviy yordam sifatida bergan, deya aniqlik kiritdi Ukraina yetakchisi.
Shu bilan birga, Zelenskiy go‘yoki 500 milliard dollarlik yordam va uni minerallar yoki boshqa resurslar bilan qaytarish haqidagi bayonotlar haqiqatga to‘g‘ri kelmasligini qo‘shimcha qildi.
Alohida dasturlar ham bo‘lgan, albatta, biz insonparvarlik yordami uchun minnatdormiz, ammo yordamning umumiy qiymati 500 milliard dollarni tashkil etdi, deb aytib, uni minerallar yoki boshqa narsalar bilan qaytarishni talab qilish mumkin emas. Bu jiddiy gap emas. Biroq biz jiddiy hujjatga tayyormiz. Bizga xavfsizlik kafolatlari kerak, deydi siyosatchi.
Izoh (0)