AQSH Xalqaro jinoiy sud prokurori Karim Xonga qarshi sanksiya qo‘lladi. U Rossiya prezidenti Vladimir Putin va Isroil bosh vaziri Binyamin Netanyaxuni hibsga olishga order bergandi. Tegishli bayonot AQSH Moliya vazirligi Xorijiy aktivlarni nazorat qilish boshqarmasi (OFAC) saytida e’lon qilindi.
Tramp fevral oyida Xalqaro jinoiy sudni AQSH va Isroilga noqonuniy hujumlar qilganlikda ayblagandi. Shundan so‘ng XJSga qarshi sanskiya kiritgandi. Hujjatda ta’kidlanishicha, XJS AQSH va Isroilga qarshi “qonunga xilof va asossiz harakatlar” sodir etgan hamda “hech qanday qonuniy asoslarsiz o‘z yurisdiksiyasini e’lon qilgan va Qo‘shma Shtatlar fuqarolari hamda ularning ayrim ittifoqchilari, jumladan, Isroilga nisbatan dastlabki tergovni boshlagan”.
Bundan tashqari, XJS “vakolatlarini suiiste’mol qilib, Isroil bosh vaziri Binyamin Netanyaxu va sobiq nudofaa vaziri Yoav Gallantni hibsga olishga asossiz orderlar bergan”likda ayblangan. Shu sababli endilikda Karim Xonga qarshi sanksiya qo‘llanmoqda.
2023-yil mart oyida XJS Vladimir Putinni hibsga olishga order berdi. Order bolalarni Ukrainadan Rossiyaga noqonuniy deportatsiya qilish bilan bog‘liq edi. Bundan tashqari, Xalqaro jinoiy sud avvalroq Putinning boshqa “harbiy jinoyatlari” bo‘yicha tergov olib borayotganini ma’lum qilgandi.
Netanyaxu va Galantani hibsga olish orderi
21-noyabr kuni Xalqaro jinoiy sud veb-saytida bir vaqtning o‘zida ikki isroillik siyosatchi — bosh vazir Binyamin Netanyaxu va o‘sha paytdagi mudofaa vaziri Yoav Galantga nisbatan hibsga olish orderini berish to‘g‘risida bayonot paydo bo‘ldi. Order 2023-yil 8-oktyabrdan 2024-yil 20-maygacha bo‘lgan davrda G‘azoda sodir etilgan harbiy jinoyatlar uchun berilgan.
Ayblovlar Isroil hukumati va qurolli kuchlarining Falastin aholisiga, xususan, G‘azo sektoridagi tinch aholiga qarshi harakatlariga taalluqli. Isroil bosh vaziri idorasi bu qarorni antisemitizm deb atagan, buyruq bergan organning o‘zini esa “noxolis va kamsituvchi” deb ta’riflagan. Shu bilan birga, Yevropa komissiyasi raisi o‘rinbosari Jozep Borrel XJS qarori Rim statutini imzolagan barcha davlatlar uchun majburiy ekanini ta’kidlagan.
Putinni hibsga olish orderi
2023-yil mart oyida Gaagadagi Xalqaro jinoiy sud Rossiya prezidenti Vladimir Putin va bolalar ombudsmani Mariya Lvova-Belovani hibsga olishga order berdi. Ular Ukrainaning bosib olingan hududlaridan bolalarni noqonuniy deportatsiya qilish va Rossiya hududiga noqonuniy ko‘chirishda ayblanmoqda. Jinoyatlar, sud ma’lumotlariga ko‘ra, 2022-yil 24-fevraldan beri sodir etilgan.
Kreml bunga javoban Rossiya Xalqaro jinoiy sud yurisdiksiyasini tan olmasligini aytgan. O‘sha paytda AQSH prezidenti bo‘lgan Jo Bayden XJS qarori asosli ekanini aytgandi.
Izoh (0)