Rossiya prezidenti Vladimir Putin va AQSH prezidenti Donald Tramp o‘rtasidagi uchrashuvni o‘tkazish uchun “Tashqi ishlar vazirligi yo‘nalishi bo‘yicha ma’lum tayyorgarlik” kerak. Bu haqda Rossiya yetakchisining matbuot kotibi Dmitriy Peskov jurnalistlarga ma’lum qildi.
Uning so‘zlariga ko‘ra, uchrashuv fevral oyining oxirigacha bo‘lib o‘tishi mumkin, ammo bu muddat ichida tomonlar kelisha olmasligi ehtimoli ham mavjud.
AQSH prezidenti fevral oyi oxirigacha rossiyalik hamkasbi bilan uchrashish imkoniyatini istisno etmadi.
Avvalroq Rossiya prezidenti yordamchisi Yuriy Ushakov 18-fevral kuni Ar-Riyodda bo‘lib o‘tgan Rossiya–AQSH muzokaralarida ikki davlat rahbarlarining ehtimoliy uchrashuvi muhokama qilinganini ma’lum qilgandi.
Biz bunga tayyormiz, biroq ikki yetakchi uchrashuvining aniq sanasi haqida gapirish hali qiyin, dedi Ushakov.
AQSH va Rossiya prezidentlari Donald Tramp va Vladimir Putin kelasi haftadayoq uchrashuv o‘tkazishi mumkinligi haqida Bloomberg aniq manbalarga havola qilmasdan xabar berdi.
Saudiya Arabistonidagi ushbu muzokaralar ikki yetakchining keyingi haftadayoq uchrashuviga yo‘l ochishi mumkin, deyiladi xabarda.
Tramp va Putin fevral oyi o‘rtalarida telefon orqali muloqot chog‘ida yuzma-yuz uchrashuv o‘tkazish bo‘yicha kelishuvga erishgan edi. Amerika prezidentining ma’lum qilishicha, ular o‘zaro tashriflar rejalarini muhokama qilgan. O‘z navbatida Rossiya prezidenti Trampni Moskvaga taklif qilgan edi.
Avvalroq NBC nashri AQSH Ukraina delegatsiyasini Saudiya Arabistonidagi Rossiya bilan muzokaralarga taklif etmagani, chunki Vashington Moskva va Kiyev vakillari bilan alohida ikki tomonlama uchrashuvlar o‘tkazib, keyinchalik qo‘shma uchrashuv uyushtirmoqchi ekani haqida yozgan edi.
Bu bizning Rossiya bilan ham, Ukraina bilan ham bir xil faollikda hamkorlik qilayotganimizni ko‘rsatadi. Biz o‘limlarni to‘xtatib, mustahkam tinchlikka erishishni xohlaymiz, dedi telekanal suhbatdoshlaridan biri.
Izoh (0)