Stoltenberg agar Xitoy Rossiyani qo‘llab-quvvatlasa, unga sanksiyalar qo‘llash bilan tahdid qildi

NATO davlatlari Rossiyaning Ukrainadagi harbiy amaliyotini qo‘llab-quvvatlagani uchun Xitoyga qarshi iqtisodiy sanksiyalar qo‘llashi mumkin, dedi NATO bosh kotibi Yens Stoltenberg. Uning fikricha, Xitoy ham Rossiya, ham G‘arb bilan yaxshi munosabatlarni saqlab,“"ikki stulda o‘tirishga harakat qilmoqda”, ammo bu uzoq davom eta olmaydi.

BBCga bergan intervyusida NATO bosh kotibi alyans Xitoyga qarshi ehtimoliy sanksiyalar muhokama qilinayotganini aytdi. Uning so‘zlariga ko‘ra, Xitoy “Ukrainaga qarshi ishlatiladigan raketa va qurollarni yaratishda Rossiya uchun zarur bo‘ladigan ko‘plab texnologiyalarga ega”.

“Ma’lum bir bosqichda, agar Xitoy o‘z xatti-harakatlarini o‘zgartirmasa, ba’zi iqtisodiy jazolar haqida o‘ylashimiz kerak”, — dedi Stoltenberg. U ehtimoliy sanksiyalar haqida hech qanday ma’lumot bermadi.

12-iyun kuni AQSH Moliya vazirligi Rossiyaga qarshi sanksiyalar ro‘yxatini kengaytirib, 300 dan ortiq yangi cheklovlar kiritdi. Xususan, sanksiyalar Xitoyning mudofaa kompaniyasi Poly Technologies, kompyuter uskunalari ishlab chiqaruvchi DeepCool, Daytek savdo va konsalting kompaniyasi, Asialink transport-logistika kompaniyasi va elektron jihozlar yetkazib beruvchi Chongqing Fagima Electro-mechanical Equipment kompaniyasiga ham taalluqli bo‘ldi. Xitoy Tashqi ishlar vazirligi AQSHdan sanksiyalarni bekor qilishni talab qildi.