Rossiya Prezidenti Vladimir Putin 19-fevral kuni Rossiya armiyasi Kursk viloyati chegarasini kesib o‘tib, Ukraina hududiga kirgani haqida bayonot berdi.
Menga bir soat oldin yetkazilgan eng so‘nggi ma’lumotga ko‘ra, bugun tunda 810-brigada jangchilari Rossiya va Ukraina chegarasini kesib o‘tib, dushman hududiga kirdi, dedi Putin Sankt-Peterburgdagi dronlar ishlab chiqarish zavodiga tashrifi chog‘ida jurnalistlarga.
U Rossiya bo‘linmalari butun jangovar to‘qnashuv chizig‘i bo‘ylab hujum qilayotganini ta’kidladi.
Avvalroq Rossiya armiyasi Kursk viloyatidagi Sverdlikovo aholi punktini ozod qilgani haqida xabar berilgan edi. 19-fevral kuni Rossiya Mudofaa vazirligi Sverdlikovni ozod qilish chog‘ida mamlakat armiyasi Suja–Rilsk yo‘lini nazorat ostiga olgani haqida ma’lum qildi.
Putin 19-dekabrdagi “Yil yakunlari” tadbirida Kursk viloyatidagi uy-joylar, ijtimoiy obyektlar, yo‘l tarmog‘i va infratuzilma qayta tiklanishini ma’lum qildi. Bundan tashqari, aholiga uylarini ta’mirlash uchun sertifikatlar berilishi aytildi.
2024-yil 6-avgustda Ukraina armiyasi Kursk viloyatida harbiy operatsiyani boshladi. 12-avgustga kelib, 28 ta aholi punkti Ukraina kuchlari nazoratiga o‘tgani haqida o‘sha paytda viloyat gubernatori vazifasini bajaruvchi Aleksey Smirnov xabar berdi. Yanvar oyida Rossiya Mudofaa vazirligi Ukraina tomoni mintaqaning 1268 kv. km hududini egallab olganini ma’lum qildi (Kursk viloyatining umumiy maydoni - 29,9 ming kv. km). Yanvar oyi o‘rtalariga kelib, Rossiya idorasi ma’lumotlariga ko‘ra, 801 kv. km (63,2%) qaytarib olishga erishilgan.
Kiyev ilgari 1991-yilgi chegaralarga qaytish va Rossiya qo‘shinlarini o‘z hududidan olib chiqib ketishni talab qilgan edi. Keyinchalik Zelenskiy yo‘qotilgan hududlarni kelajakda diplomatik yo‘l bilan qaytarish mumkinligini qayd etgan.
Izoh (0)