Migratsiya agentligi qashqadaryoliklar Rossiyaga hech qanday to‘lovlarsiz ishga yuborilishini ma’lum qildi.
Qayd etilishicha, Rossiyaning Tatariston Respublikasi Qozon shahrida joylashgan “Alabuga Development” qurilish tashkiloti qashqadaryoliklarni ishga taklif etmoqda. Yo‘nalishlar:
- beton quyuvchi;
- g‘isht teruvchi;
- bo‘yoqchi;
- armatura to‘quvchi;
- shtukatur;
- malaka talab etilmaydigan ishchi.
Ma’lum qilinishicha, oylik 130 ming rubldan 180 ming rublgacha (taxminan 26 million so‘m). Nomzodlarga qo‘yiladigan talablar:
- yosh chegarasi: 18-50 yoshdagi erkaklar;
- rus tilini muloqot darajasida bilish;
- O‘zbekistondan chiqishga taqiqi bo‘lmasligi;
- Rossiya Federatsiyasiga kirish taqiqi (deport) yo‘qligi
Imtiyozlar:
- aviachipta;
- aeroportdan ish joyigacha transfer;
- ishlash huquqini beruvchi ruxsatnoma (patent);
- tajriba talab qilinmaydi;
- tibbiy sug‘urta;
- ish vaqti: 08-00 dan 19-00 gacha (11 soat);
- 3 mahal ovqat;
- yotoq joy.
Tanlov 21-fevral kuni Qarshi shahri, A.Navoiy ko‘chasi, 70a-uy (Mo‘ljal: Oydin bozor ro‘parasi) hamda shahar, tuman Kambag‘allikni qisqartirish va bandlikka ko‘maklashish bo‘limlarida soat 11:00, 14:00, 16:00 larda bo‘lib o‘tadi.
Suhbatga fuqarolik va xorijga chiqish pasporti bilan kelish so‘raldi.
Xorijdan ishga takliflar:
- Maosh 2,5 ming dollar: Hyundai kompaniyasi o‘zbekistonliklarni ishga oladi
- Maosh soatiga salkam 13 yevro: o‘zbekistonliklar Germaniyaga ishga taklif qilinmoqda
- O‘zbekistonliklar Polshaga ishga taklif qilinmoqda
Bundan avval Litva korxonalari bilan 200 nafar O‘zbekiston fuqarosini ishga joylashtirish to‘g‘risida kelishuvga erishilgandi. Shuningdek, o‘zbekistonliklar Yaponiyaga logistika, aeroport xizmati va yuk tashish yo‘nalishlarida ishga yuborilishi aytilgandi.
O‘zbekistonda 2018—2023-yillarda aholi daromadining 16 foizi migrantlar ulushiga to‘g‘ri kelgan. Chet ellarda ishlayotgan yurtdoshlar har yili O‘zbekistonga o‘n ikki-o‘n besh milliard dollar jo‘natadi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan.
Qarorga ko‘ra, 2024-yil 1-noyabrdan:
- xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi;
- Agentlikning elektron platformasida fuqarolarga o‘zining rezyumesini shakllantirish va joylashtirish hamda eʼlon qilingan ish o‘rinlari bo‘yicha tanlovlarda erkin ishtirok etish imkoniyati yaratiladi;
- vaqtincha mehnat faoliyatiga chiqib ketayotgan fuqarolarga Migratsiya jamg‘armasi hisobidan 10 million so‘mgacha ikki yil muddatga mikrokreditlar ajratiladi;
- fuqarolarning xorijda ishga joylashishi va “ishchi viza”ga oid hujjatlarini rasmiylashtirish bo‘yicha bepul konsalting xizmatlari ko‘rsatiladi.
2024-yil 1-dekabrdan agentlik tomonidan taʼlim tashkilotlarida xorijga ishga ketmoqchi bo‘lgan fuqarolarni kasb-hunar va chet tillariga o‘qitish bo‘yicha buyurtmalar joylashtirish tartibi joriy etiladi.
Shuningdek, xususiy bandlik agentliklari tomonidan litsenziya olish uchun zaxira qilinadigan mablag‘lar miqdori BHMning 8500 baravaridan 4000 baravarigacha tushiriladi.
Izoh (0)