Миграция агентлиги қашқадарёликлар Россияга ҳеч қандай тўловларсиз ишга юборилишини маълум қилди.
Қайд этилишича, Россиянинг Татаристон Республикаси Қозон шаҳрида жойлашган Аlabuga Development қурилиш ташкилоти қашқадарёликларни ишга таклиф этмоқда. Йўналишлар:
- бетон қуювчи;
- ғишт терувчи;
- бўёқчи;
- арматура тўқувчи;
- штукатур;
- малака талаб этилмайдиган ишчи.
Маълум қилинишича, ойлик 130 минг рублдан 180 минг рублгача (тахминан 26 миллион сўм). Номзодларга қўйиладиган талаблар:
- ёш чегараси: 18-50 ёшдаги эркаклар;
- рус тилини мулоқот даражасида билиш;
- Ўзбекистондан чиқишга тақиқи бўлмаслиги;
- Россия Федерациясига кириш тақиқи (депорт) йўқлиги
Имтиёзлар:
- авиачипта;
- аэропортдан иш жойигача трансфер;
- ишлаш ҳуқуқини берувчи рухсатнома (патент);
- тажриба талаб қилинмайди;
- тиббий суғурта;
- иш вақти: 08-00 дан 19-00 гача (11 соат);
- 3 маҳал овқат;
- ётоқ жой.
Танлов 21 февраль куни Қарши шаҳри, А.Навоий кўчаси, 70а-уй (Мўлжал: “Ойдин” бозор рўпараси) ҳамда шаҳар, туман Камбағалликни қисқартириш ва бандликка кўмаклашиш бўлимларида соат 11:00, 14:00, 16:00 ларда бўлиб ўтади.
Суҳбатга фуқаролик ва хорижга чиқиш паспорти билан келиш сўралди.
Хориждан ишга таклифлар:
- Маош 2,5 минг доллар: Hyundai компанияси ўзбекистонликларни ишга олади
- Маош соатига салкам 13 евро: ўзбекистонликлар Германияга ишга таклиф қилинмоқда
- Ўзбекистонликлар Польшага ишга таклиф қилинмоқда
Бундан аввал Литва корхоналари билан 200 нафар Ўзбекистон фуқаросини ишга жойлаштириш тўғрисида келишувга эришилганди. Шунингдек, ўзбекистонликлар Японияга логистика, аэропорт хизмати ва юк ташиш йўналишларида ишга юборилиши айтилганди.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Президентнинг “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарори қабул қилинган.
Қарорга кўра, 2024 йил 1 ноябрдан:
- хорижий иш берувчилар томонидан таклиф қилинаётган иш ўринлари ҳақидаги барча маълумотлар Миграция агентлигининг электрон платформаси, ОАВ ва ижтимоий тармоқларда очиқ эълон қилиб борилади;
- Агентликнинг электрон платформасида фуқароларга ўзининг резюмесини шакллантириш ва жойлаштириш ҳамда эълон қилинган иш ўринлари бўйича танловларда эркин иштирок этиш имконияти яратилади;
- вақтинча меҳнат фаолиятига чиқиб кетаётган фуқароларга Миграция жамғармаси ҳисобидан 10 миллион сўмгача икки йил муддатга микрокредитлар ажратилади;
- фуқароларнинг хорижда ишга жойлашиши ва “ишчи виза”га оид ҳужжатларини расмийлаштириш бўйича бепул консалтинг хизматлари кўрсатилади.
2024 йил 1 декабрдан агентлик томонидан таълим ташкилотларида хорижга ишга кетмоқчи бўлган фуқароларни касб-ҳунар ва чет тилларига ўқитиш бўйича буюртмалар жойлаштириш тартиби жорий этилади.
Шунингдек, хусусий бандлик агентликлари томонидан лицензия олиш учун захира қилинадиган маблағлар миқдори БҲМнинг 8500 бараваридан 4000 бараваригача туширилади.
Изоҳ (0)