Ukrainaning AQSH harbiy yordamisiz omon qolishi juda qiyin bo‘ladi.
Bu haqda Ukraina prezidenti Vladimir Zelenskiy NBC News telekanaliga bergan intervyusida aytdi.
“Bu juda, juda va juda qiyin bo‘ladi. Albatta, barcha qiyin vaziyatlarda qo‘shimcha imkoniyat bo‘ladi. Lekin bizda Amerika Qo‘shma Shtatlari ko‘magisiz omon qolish uchun imkoniyat kam, deyarli yo‘q. Menimcha, bu juda muhim, o‘ta muhim”, dedi u.
U Amerika ko‘magisiz Rossiyaga qarshi kurashish haqida o‘ylamoqchi emasligini, Ukraina va AQSH strategik sherik sifatida qolishiga umid qilishini taʼkidladi.
Zelenskiyning qo‘shimcha qilishicha, Rossiya prezidenti Vladimir Putin Ukrainani urushni to‘xtatish uchun emas, balki baʼzi sanksiyalarni bekor qilish va Rossiya qo‘shinlarining qayta to‘planishiga imkon beradigan sulhga erishish uchun muzokaralar stoliga o‘tirishga chaqirmoqda.
Avvalroq Zelenskiy NATO aʼzoligi o‘rniga Ukrainaga nima kerakligini aytgandi.
“Agar Ukrainani NATOga qabul qilishmasa, unda mamlakatda 1,5 million kishilik armiya, armiyada esa zamonaviy qurollar bo‘lishi kerak” dedi Zelenskiy.
Uning so‘zlariga ko‘ra, “bugungi Amerika va prezident Tramp Ukrainaning NATOga kirishi haqida gapirishga tayyor emas”.
Izoh (0)