Yuzlab yamanlik yoshlar yolg‘on va’dalarga aldanib, Rossiyaga yuborilmoqda. Bu haqda ularning yaqinlari DW nashriga ma’lum qildi.
U yerda ular, ehtimol, o‘z xohishlariga qarshi Ukrainadagi frontga jang qilish uchun yuborilgan.
“Ahmadga (ism-familiya tahririyat tomonidan o‘zgartirilgan) omad kulib boqmadi”, deb yozadi nashr.
Uning oilasiga yaqin shaxsning so‘zlariga ko‘ra, u vositachi orqali Rossiyaga ishga yollangan. Yaxshi maosh va’da qilishgan, Ahmad esa bu taklifni qabul qilgan. Ammo Rossiyaning ko‘mir konida va’da qilingan ish o‘rniga u tez orada o‘z xohishiga qarshi Rossiyaning Ukrainaga qarshi urushga yuborilgan.
Aniqlanishicha, u yerda Ahmadga nisbatan juda qo‘pol muomalada bo‘lishgan.
DW’ning Yamandagi boshqa manbalari shunga o‘xshash holatlar haqida gapirib berishdi: ularga ko‘ra, ularning do‘stlari yoki tanishlari ham yolg‘on va’dalar bilan Rossiyaga chaqirilgan, ammo keyin frontga jo‘natilgan.
Yamanliklardan biri boshqa yamanliklar singari frontda bo‘lgan do‘sti ham barcha aloqa vositalaridan uzilganini aytgan.
“Hech kim u bilan bog‘lana olmaydi, hech kim unga yordam bera olmaydi. Yamanliklar frontda butunlay yakkalanib qolgan”, deydi DW manbasi.
Manbaning ta’kidlashicha, uning do‘sti 24 kishidan iborat guruh a’zosi bo‘lib, ularning barchasi Sana va Taiz shaharlari atrofida yollangan.
Jenevada joylashgan Yaman inson huquqlari tashkiloti SAM’ga ko‘ra, Rossiya-Ukraina urushida jang qilayotgan yamanliklar 500-700 kishini tashkil qilishi mumkin.
SAM’ning qayd etishicha, Yamanda yoshlar xalqaro tarmoq orqali ishga olinadi.
“Uning xodimlari Rossiyada harbiy xizmatga aloqasi bo‘lmagan ishlarni va’da qilmoqdalar. Ularga 10 ming dollargacha maosh va’da qilingan”, deydi tashkilot direktori Tavfiq al-Hamidiy.
Hozirda yamanliklar mamlakatdagi narxlarning oshishi bilan bog‘liq qiyinchiliklarga duch kelmoqda
Al-Hamidiy yoshlar buni birinchi navbatda Yamandagi o‘n yillik urushdan keyingi vaziyat bilan bog‘liq ekanini ta’kidladi:
“Kelajak uchun deyarli hech qanday istiqbol yo‘q, ko‘pchilik tez o‘sib borayotgan narxlarga dosh berishga qiynalmoqda. Ayrim odam savdogarlari bu vaziyatdan foydalanib yamanlik yoshlarni o‘z safiga jalb qila boshladi”.
Financial Times (FT) yamanlik yollanma askarlarning Ukrainadagi urushda ishtirok etgani haqida xabar bergan birinchi G‘arb OAV bo‘ldi. Yamanliklar tomonidan imzolangan, FT tomonidan ko‘rilgan shartnomalar, taniqli husiy siyosatchi Abdulvali Abdo Hasan al-Jabriy tomonidan asos solingan kompaniyani aniqlaydi.
FT ma’lumotlariga ko‘ra, kompaniya Ummonda turoperator va tibbiy asbob-uskunalar hamda dori-darmonlarni chakana yetkazib beruvchi sifatida ro‘yxatdan o‘tgan. “Al-Jaberi” MCHJ uning nomiga Nijniy Novgorodda ro‘yxatdan o‘tgan bo‘lib, uning asosiy faoliyati yo‘lovchi tashish hisoblanadi.
SAM inson huquqlari tashkiloti hisobotiga ko‘ra, ishga qabul qilish jarayonida Rossiyaning Ummondagi konsulligida ishlaydigan va al-Jabriy idorasida Rossiya vakili ekani aytilgan Dmitriy ismli noma’lum shaxs ishtirok etmoqda.
SAM ma’lumotlariga ko‘ra, yamanliklar aksariyat hollarda arab tiliga tarjima qilinmagan shartnomalar imzolagan va kelishuv matnini yaxshi tushunmagan. Natijada Rossiyada ular suhbatlarda va’da qilinganidan butunlay boshqacha vaziyatga duch kelishdi.
“Ular yetib kelgach, shafqatsiz munosabatda bo‘lishadi, deyiladi xabarda, — og‘ir va g‘ayriinsoniy sharoitlarda, oziq-ovqat va tibbiy yordam ko‘rsatilmagan yoki umuman taʼminlanmagan holda jang qilishga majburlangan. Yaman inson huquqlari tashkilotining ta’kidlashicha, otishmalar paytida yollanma askarlar yaralangan yoki halok bo‘lmoqda”.
Izoh (0)