Finlyandiya tashqi ishlar vaziri Elina Valtonen AQSH prezidenti Donald Tramp Ukraina mojarosi bo‘yicha Rossiya bilan shartnoma tuzishga shoshilmasligi kerakligini aytdi.
Uning so‘zlariga ko‘ra, inqirozni hal qilish nafaqat Kiyevga, balki barcha Yevropa davlatlari xavfsizligiga ham tegishli. Shu sababli Yevropa AQSHni “tezkor kelishuv” emas, balki “mustahkam tinchlik” tuzish zarurligiga ishontirishi kerak.
Bu masala bo‘yicha hozir AQSHdagi hamkorlarimiz bilan ochiq gaplashish har qachongidan ham muhim. Tramp va uning jamoasi Rossiya bilan muzokaralar nafaqat Ukrainaga, balki butun Yevropa xavfsizligiga ham tegishli ekanligini tushunishlari kerak. Tezkor kelishuv bo‘lishi mumkin emas, faqat bir necha yilga mo‘ljallangan uzoq jarayon, uning yakunida esa barqaror tinchlik o‘rnatiladi, dedi u Germaniyaning RND nashriga.
Valtonenning fikricha, Rossiyani tashqi bosim yordamida muzokaralar stoliga o‘tirishga majburlash kerak. U, shuningdek, tinchlikni saqlash uchun “Yevropa kuch ko‘rsatishni o‘rganishi kerak”ligini qo‘shimcha qildi.
Finlyandiyalik vazir, shuningdek, mojaro tugaganidan keyin ham Rossiyaga qarshi sanksiyalarni saqlab qolish kerakligini eslatib o‘tdi.
Putin va Tramp Pasxa bayrami yoki 9-maygacha Ukraina bo‘yicha kelishuvga erishishi mumkin
Financial Times nashri Tramp va Rossiya rahbari Vladimir Putin 20-aprelga to‘g‘ri keladigan Pasxa bayrami yoki 9-mayga qadar Ukrainadagi urushni to‘xtatish bo‘yicha kelishuvga erishishi mumkinligi haqida yozgan edi.
“Putin shunday muhim kunlardan birida kelishuvga erishishni xohlaydi”, deya ukrainalik amaldorning so‘zlaridan iqtibos keltiradi nashr.
Putinga yaqin manbalarga ko‘ra, prezidentning asosiy maqsadi Rossiyaga Yevropadagi ta’sir doirasiga o‘xshash mavqeni ta’minlaydigan yangi xavfsizlik tizimini yaratishdir. Bu xuddi Ikkinchi jahon urushi oxirida Yalta konferensiyasi Sovet ittifoqiga bergan imkoniyatlarga o‘xshash bo‘lishi kutilmoqda.
Hozirgi vaziyat Putin uchun uch yillik urushning boshqa har qanday davridagidan ham qulay ko‘rinmoqda, deb ta’kidlaydi Berlindagi Karnegi Yevrosiyo markazi direktori Aleksandr Gabuyev.
U AQSH Ukrainani harbiy va diplomatik jihatdan qo‘llab-quvvatlashni, razvedka ma’lumotlari almashishni to‘xtatsa, Kiyev juda og‘ir ahvolga tushishi ta’kidladi.
Bu Yevropa davlatlari yanada ko‘proq aralashsa ham, inqirozdan chiqishni kafolatlamaydi, dedi u.
Izoh (0)