AQSH Ukrainadagi jangovar harakatlar boshlanganining uchinchi yilligiga bag‘ishlangan G7 (“Yettilik guruhi”) bayonotida Rossiyani “tajovuzkor” deb atashga qarshilik ko‘rsatmoqda. Bu haqda Financial Times vaziyatdan xabardor beshta manbaga asoslanib xabar berdi.
Amerikaliklar bu ta’rifni taqiqlamoqda, ammo biz hali ham u ustida ishlamoqdamiz va kelishuvga erishishga umid qilmoqdamiz, dedi nashr suhbatdoshi.
U Moskva va Kiyev o‘rtasida “farq qo‘yish” zarurligini ta’kidladi.
Gazeta ma’lumotlariga ko‘ra, Ukraina prezidenti Vladimir Zelenskiyning G7 sammitida ishtiroki hali tasdiqlanmagan. Tadbir 24-fevral kuni videoaloqa orqali o‘tkaziladi.
FT’ning ikki suhbatdoshiga ko‘ra, AQSH prezidenti Donald Tramp ma’muriyati jangovar harakatlarni sharhlashda ularni “Ukraina mojarosi” deb atamoqda.
Reuters’ning xabar berishicha, AQSH bu yil Ukrainaning hududiy yaxlitligiga sodiqlikni tasdiqlash va “Rossiya tajovuzi”ni qoralashga qaratilgan, janglar boshlanganining 3 yilligiga bag‘ishlangan BMT rezolyutsiyasining hammuallifi bo‘lmaydi.
O‘tgan yilgi G7 davlatlarining qo‘shma bayonotida Rossiyaning harakatlariga nisbatan “tajovuz” so‘zi besh marta ishlatilgan edi.
Tramp va Zelenskiy so‘nggi hafta davomida bir-birini bir necha bor ochiqchasiga tanqid qildi. Jumladan, respublikachi Rossiya–Ukraina urushi boshlanishi uchun javobgarlikni Kiyevga yukladi:
Siz buni hech qachon boshlamasligingiz kerak edi. Kelishuvga erishishingiz mumkin edi, deydi AQSH yetakchisi.
U Ukraina prezidentini “saylovsiz diktator” deb atadi.
Saylovsiz diktator. Zelenskiy tezroq harakat qilishi kerak, aks holda uning mamlakati butkul tamom bo‘ladi. Biz Rossiya bilan urushni tugatish bo‘yicha muzokaralarni muvaffaqiyatli olib bormoqdamiz. Buni faqat Tramp va uning ma’muriyati uddalay olishini barcha e’tirof etdi, deydi AQSH yetakchisi.
Zelenskiy esa Tramp Rossiya dezinformatsiyasi qurboniga aylanganini aytdi.
Rossiya prezidenti Vladimir Putin tajovuzni Kiyev ko‘rsatganiga ishonch bildirdi:
Ukraina rejimi tajovuzni Rossiyaga qarshi boshlagani yo‘q, u biz tan olgan Lugansk va Donetsk xalq respublikalariga qarshi ular Rossiya tarkibiga kirishidan oldinroq tajovuzni boshlagan edi.
Izoh (0)