Shimoliy Koreya 2024-yil talaba qiyofasida minglab fuqarolarini Rossiyaga ishlash uchun yubordi. Bu haqda Janubiy Koreya razvedkasiga tayanib Yonhap xabar berdi.
Razvedka ma’lumotlariga ko‘ra, KXDR Ukraina bilan urush tufayli yuzaga kelgan ishchi kuchi taqchilligi sababli Rossiyadagi qurilish maydonlariga minglab ishchilarni jo‘natgan. BMT Xavfsizlik kengashi esa Shimoliy Koreyaning qurol sinovlariga javoban o‘z fuqarolarini chet elga ishga yuborishni taqiqlagan va barcha shimoliy koreyalik ishchilar 2019-yil dekabr oyigacha vataniga qaytishi shart edi.
KXDR fuqarolarini Rossiyaga yuborish uchun talaba vizalaridan foydalangani gumon qilinmoqda. 2024-yil Shimoliy Koreyaning 13 221 nafar fuqarosi Rossiyaga kelgan, bu undan oldingi yilga nisbatan taxminan 12 baravar ko‘p. Shundan 7887 nafari ta’lim olish maqsadida kelgani ko‘rsatilgan.
Janubiy Koreya rasmiylariga ko‘ra, KXDR Ukraina harbiylariga qarshi kurashish uchun Rossiyaning g‘arbiy front chizig‘i bo‘lgan Kursk viloyatiga 11 mingga yaqin askarini yuborgan.
Rossiya va KXDR hamkorligi
Rossiya va Shimoliy Koreya urush boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzolagandi.
Ukraina armiyasi Kursk viloyatida shimoliy koreyalik ikki askarni asirga olgan. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidlagan.
Ukraina armiyasi bunday yo‘qotishlarni bir qator sabablar bilan izohlamoqda. Jumladan, Shimoliy Koreya askarlari “Ikkinchi jahon urushi davridagi kabi” piyoda hujum qilgan va Ukraina dronlari hamda artilleriyasi uchun oson nishon bo‘lgan. Ular odatda nishonga olinsalar ham, hujumni davom ettirgan.
Bundan tashqari, asirga tushmaslik uchun Shimoliy Koreya askarlari o‘zlarini granatalar bilan portlatgan. Shuningdek, KXDR askarlari til bilan bog‘liq muammo tufayli Rossiya qo‘shinlari bilan kontaktga yaxshi kirishmagan. Hatto tasodifan Rossiya pozitsiyalariga hujum qilgan.
Katta yo‘qotishlarga qaramay, Pxenyan yaqin ikki oy ichida Rossiyaga harbiylarning yangi guruhini yuborishi mumkin. Shimoliy Koreya Moskvani qo‘llab-quvvatlash uchun 100 minggacha askar berishga tayyorligini ma’lum qilgani aytilmoqda. Ukraina razvedkasi rahbari Kirill Budanov KXDRdan qo‘shimcha kuch kelishi mumkinligini tasdiqlagan. Ammo Kiyevda Shimoliy Koreyaning ko‘p sonli yangi jangovar qismlari paydo bo‘lishini kutmayotganini aytgan.
Izoh (0)