Rossiyada migrantlarga vaqtinchalik yashash ruxsatnomasi va fuqarolikni berishni taqiqlash taklif etilmoqda. Bu haqda “Adolatli Rossiya” partiyasi deputatlariga tayanib, “Kommersant” xabar berdi.
Gap tashkiliy tanlov asosida ishga jalb qilinadigan migrantlar haqida bormoqda. Deputatlar bunday ishchilarning oila a’zolari va qarindoshlariga mamlakatga kirishni taqiqlash tarafdori.
Tashkiliy ishga qabul qilish doirasida jalb qilinadigan malakasiz xorijlik ishchilar Rossiyada vaqtinchalik yashash ruxsatnomasi, shuningdek Rossiya fuqaroligini olish huquqiga ega bo‘lmasligi kerak, deyiladi tashabbusda.
Shuningdek, migrantning Rossiyada bo‘lish muddatini uning mehnat shartnomasi muddati bilan cheklash taklif qilinmoqda. Shartnoma tugagandan so‘ng xodim mamlakatni tark etishi kerak, ish beruvchi esa uning ketishini ta’minlashi shart.
Rossiyadan deportatsiya qilingan muhojirlar soni ko‘paydi
Rossiya ichki ishlar vaziri Vladimir Kolokolsev mamlakatdan chiqarib yuborilayotgan muhojirlar soni oshganini aytdi. Rossiya IIV ma’lumotlariga ko‘ra, 2015-yildan buyon deportatsiya qilingan muhojirlar soni bir yarim barobarga ortgan.
Mamlakatda bo‘lish tartibini buzgani uchun deportatsiya qilingan xorijliklar soni 15 foizga oshgan. Bundan tashqari, 34 ming nafar muhojirning Rossiyada vaqtincha bo‘lish muddati qisqartirilgan, 180 ming nafar xorijlikka mamlakatga kirish taqiqlangan.
Migrantlarning rus tilini o‘rganishi bo‘yicha chaqiriqlar
Rossiya prezidenti Vladimir Putin 5-noyabr kuni rus tilini kam yoki umuman bilmaydigan xorijlik bolalar bilan ishlash algoritmini ishlab chiqishga chaqirdi. U rus tilini bilishga qo‘yiladigan talab darajalarini aniqlash va mustahkamlashni topshirdi.
Iyul oyida “Rosobrnadzor” rahbari Anzor Muzayev rus tilini bilmaydigan migrant bolalarni maktabga qabul qilmaslikni taklif qilgandi. U chet el fuqarolari oilalari bilan Rossiyaga ko‘chib kelgan bo‘lsa va bu yerda yashashni rejalashtirayotgan bo‘lsa, ularning farzandlari rus tilini o‘rganishi kerakligini aytgan.
Iyun oyida Inson huquqlari bo‘yicha kengash rahbari Valeriy Fadeyev maktabda “rus tilini bilmaydigan birorta ham bola ro‘yxatda turmasligi kerak”ligini aytgan.
Izoh (0)