“Rossiya mag‘lubiyatga uchramaslik uchun barcha vositalarni ishga soladi” — Lavrov

Rossiya Ukraina bilan urushda mag‘lubiyatga uchramaslik uchun barcha vositalarni ishga soladi. Bu haqda Rossiya TIV rahbari Sergey Lavrov Taker Karlsonga bergan intervyusida ma’lum qildi.

“Qo‘shma Shtatlar va uning ittifoqchilari Rossiya uchun strategik mag‘lubiyat deb ataydigan narsaga erishishlariga yo‘l qo‘ymaslik uchun har qanday vositadan foydalanishga tayyor ekanligimizni tushunishlari kerak”, dedi Rossiya TIV rahbari.

Shu bilan birga, u Rossiyaning yaqinda Ukrainaga qarshi yangi “Oreshnik” o‘rta masofali gipertovushli raketasini qo‘llashini G‘arb “jiddiy qabul qilishi” kerak bo‘lgan “signal” deb atadi.

Rossiya TIV rahbari G‘arbni “Rossiyaning qizil chiziqlarini siljitish mumkin” degan noto‘g‘ri fikrdan ogohlantirdi. U bu katta xato ekanini qayd etgan.

Shuningdek, Lavrov Rossiya Ukrainadagi urush tinch yo‘l bilan hal etilishi tarafdori ekanini ta’kidladi.

“Putin yaqinda barcha mumkin bo‘lgan ssenariylarga tayyor ekanimizni aytdi. Lekin biz urushni muzokaralar orqali tinch yo‘l bilan hal qilishni afzal ko‘ramiz, dedi”, deya qo‘shimcha qilgan u.

Lavrov Rossiya Qo‘shma Shtatlar bilan yadroviy urush bo‘lishini istamasligini va uning oldini olish uchun barcha harakatlarni qilishini ma’lum qildi:

“Rossiya harbiy doktrinasining asosiy maqsadi yadro urushidan qochishdir”.

Lavrov avval ham bir necha bor mamlakat har doim yadro urushi oldini olish tarafdori ekanini aytgan edi. 

“Biz yadroviy urushning oldini olish uchun hamma narsa qilinishi kerak degan pozitsiyaga qatʼiy amal qilamiz. Yadroviy qurol, eng avvalo, har qanday yadroviy urushni to‘xtatish, oldini olish, tiyib turish vositasi ekaniga aminmiz. Biz vaziyatga shunday yondashamiz”, dedi Rossiya TIV rahbari.

Vazirning so‘zlariga ko‘ra, prezident Vladimir Putin bugun, 19-noyabr kuni maʼqullagan yangilangan Rossiya doktrinasida Amerikaning yadro bo‘yicha doktrinalaridan farq qiladigan hech narsa yo‘q.

Yangi doktrinaga ko‘ra, Ukrainaning Rossiyaga qarshi G‘arbning yadrosiz raketalarini qo‘llashi yadroviy javob zarbasiga olib kelishi mumkin, deya tushuntirish berdi rasmiy Kreml.