O‘zbekiston afg‘on uchuvchilari olib o‘tgan vertolyotlarning bir qismini AQSHga qaytargandi. “Tolibon” boshqaruvidagi Mudofaa vazirligi mazkur harakatga norozilik bildirdi.
Vazirlik vertolyotlar Afg‘oniston mulki hisoblanishi va ular qaytarilishi kerakligini yana ta’kidladi.
“Islomiy Amirligi bu masaladan tashvishda, chunki bu vertolyotlar Afg‘onistonga tegishli bo‘lib, avvalgi hukumat amaldorlari qochib ketganida O‘zbekistonga olib o‘tilgan, shu bois ular Afg‘onistonga qaytarilishi lozim.
Bu vertolyotlarning qandaydir sabablarga ko‘ra Qo‘shma Shtatlarga topshirilishi biz uchun qabul qilib bo‘lmas holat, chunki Afg‘oniston xalqi o‘z huquqlarini himoya qilish va talab qilish huquqiga ega, qo‘shni mamlakatlar ham afg‘onlarning huquqlariga hurmat ko‘rsatishi zarur”, deyiladi bayonotda.
“Tolibon” AQSHdan to‘siqlar yaratish o‘rniga vertolyotlarni Afg‘onistonga qaytarishga ko‘maklashishni so‘radi.
2021-yil “Tolibon” Kobulni egallaganida afg‘on harbiylari Surxondaryoga samolyot va vertolyotlar bilan uchib o‘tgan. Mazkur vertolyotlar aslida AQSH hukumati puliga sotib olingan va Afg‘oniston sobiq hukumatiga vaqtinchalik foydalanishga topshirilgandi. O‘zbekiston hududiga Embraer EMB 314 Super Tucano va Pilatus PC-12 rusumdagi 22 ta harbiy samolyot va UH-60 Black Hawk, MD-530 va Mi-17 rusumdagi 24 ta vertolyot olib o‘tilgandi.
Biroq “Tolibon” texnikalar afg‘on xalqiga tegishli ekanini aytib, ularni qaytarishni talab qilib kelmoqda. 2024-yili AQSH 40 dan ortiq samolyot va vertolyotlarni O‘zbekistonda qoldirishga qaror qilgan. Bundan norozi “Tolibon” esa AQSH afg‘on xalqining mulkini “musodara qilishga haqqi yo‘q”ligini aytib, O‘zbekistonni ularni qaytarishga chaqirgandi.
2025-yil O‘zbekistonning Vashingtondagi elchixonasida o‘tgan tadbirda qatnashgan Pentagon rasmiylari vertolyotlarning bir qismi qaytarilganini ma’lum qildi. Xabarda yaroqli deb topilgan aviatexnikalardan 7 ta Black Hawk vertolyoti AQSHga qaytarilgani ta’kidlagan.
Izoh (0)