AQSHning saylangan prezidenti Donald Tramp agar Kanada noqonuniy migratsiya va giyohvand moddalar kontrabandasi hal qilmasa, u AQSHning 51-shtatiga aylanishi mumkinligini aytdi. Bu haqda Fox News xabar berdi.
Tramp mazkur bayonotini Kanada bosh vaziri Jastin Tryudo bilan uchrashuvda aytgan. U Kanada tovarlariga import bojini kiritish bilan ham ogohlantirgan.
Tramp agar Kanada AQSHga noqonuniy muhojirlar oqimini hal qilmasa, o‘z inauguratsiyasi kunidayoq (20-yanvar) barcha Kanada tovarlariga 25 foiz miqdorida import bojini joriy etish bilan tahdid qildi. Shuningdek, u savdo taqchilligini kamaytirish zarurligini ta’kidladi. Tryudo bunday choralar Kanada iqtisodiyotini vayron qilishini aytgach, Tramp Kanada, ehtimol, AQSHning 51-shtatiga aylanishi mumkinligini bildirdi, deb xabar bermoqda Fox News.
https://x.com/EndWokeness/status/1863741063011225962
Shuningdek, Tramp Tryudo “AQSHning 51-shtati gubernatori bo‘lishi mumkin edi” deya qo‘shimcha qilgan. Respublikachining bayonoti Kanada bosh vazirining “asabiy jilmayishiga”ga sabab bo‘lgani aytilmoqda.
Tryudo 30-noyabr kuni Kanada, Xitoy va Meksikadan keltirilayotgan tovarlarga yangi bojlar joriy etish masalasini muhokama qilish uchun Floridaga uchib kelgandi. AQSHning saylangan prezidenti o‘z navbatida bu uchrashuvni “samarali” deb baholagan.
Tramp uchta davlat tovarlariga bojlar joriy etmoqchi
AQSHning saylangan prezidenti Meksika va Kanada tovarlariga 25 foizlik, Xitoynikiga esa 10 foizlik boj joriy etishini aytdi. Qaror noqonuniy migrantlar oqimi va giyohvand moddalar kontrabandasi bilan bog‘liq.
20-yanvardan boshlab Meksika va Kanadaning barcha tovarlarga 25 foizlik tarif joriy etish to‘g‘risidagi farmonni imzolayman. Ushbu tarif giyohvand moddalar, ayniqsa, fentanil va noqonuniy migrantlar mamlakatimizga bostirib kirishni to‘xtatmaguncha o‘z kuchida qoladi, degan Tramp.
U AQSHga asosan Meksika orqali fentanil olib kelinadigan Xitoy uchun 10 foizlik boj joriy etishni rejalashtirayotganini aytgan. Siyosatchi Xitoy rasmiylari har qanday giyohvand moddalar savdogarlari uchun o‘lim jazosini va’da qilgani, ammo va’dalarini bajarmaganini eslatgan.
Izoh (0)