АҚШ президенти Дональд Трамп Канада армияга етарлича пул сарфламаётганини айтди, деб хабар бермоқда Оқ уй матбуот хизмати.
Трамп буни Канада Американинг ёрдамига умид қилаётгани билан изоҳлади. У, шунингдек, Канадани АҚШнинг қўллаб-қувватлашисиз “яшашга қодир бўлмаган мамлакат” деб атади.
Биз уларни йилига тахминан 200 миллиард долларга субсидиялаймиз. Агар биз буни тўхтацак, божлар жорий этиш ҳисобига уларга машиналар ишлаб чиқаришга рухсат бермасак, улар мустақил яшашга қодир бўлмаган мамлакат бўлиб қолади, дейди Луизианага сафари чоғида Трамп журналистларга.
АҚШ етакчиси ўз мамлакати билан “ажойиб муносабат”да бўлган Канада халқини яхши кўришини таъкидлади. Унинг сўзларига кўра, давлат учун энг яхши ечим “АҚШнинг 51-штати бўлиш”дир.
Канада мамлакатга сунъий чегарасиз қўшилса, жуда яхши бўларди, деб қўшимча қилди Трамп.
Канаданинг Америка штатига айлантирилиши ҳақидаги гап-сўзлар Трампнинг АҚШ президенти лавозимига расман киришишидан олдин бошланган эди. У давлатлар ўртасидаги чегарани “сунъий чизиқ” деб атади ва Канаданинг қўшилиши “миллий хавфсизлик учун яхшироқ” бўлишини айтди.
Трампнинг Канадани АҚШ таркибига қўшиб олиш ҳақидаги баёнотлари
Трамп 5 ноябрь куни бўлиб ўтган сайловларда ғалаба қозонгач, Канадага таҳдид қилишни бошлади. Сиёсатчи дастлаб Мексика ва Канада товарларига 25 фоизлик, Хитойникига эса 10 фоизлик бож жорий этишини айтганди. Бу ноқонуний мигрантлар оқими ва гиёҳванд моддалар контрабандаси билан боғлиқ.
Трамп тегишли баёнотни Канада бош вазири Жастин Тюдо билан суҳбатда ҳам билдирганди. У агар тегишли чора кўрилмаса, Канада АҚШнинг 51-штати, Трюдо эса унинг губернатори бўлишини таъкидлаган. Шунингдек, Канада Қўшма Штатларга қўшиб олинган тақдирда, мамлакатдаги солиқлар 60 фоиздан кўпроққа пасайишини билдирган.
Агар Канада бизнинг 51-штатимизга айланса, уларнинг солиқлари 60 фоиздан кўпроққа камаяди, бизнеслари дарҳол икки баробар ўсади ва улар дунёдаги бошқа ҳеч қайси давлатда бўлмаган ҳарбий ҳимояга эга бўлади, деб ёзган Трамп Truth Social тармоғида.
6 январь куни Канада бош вазири Жастин Трюдо либераллар партияси раҳбари лавозимидан кетишини эълон қилди. Трамп эса бунга ҳам муносабат билдирмай қолмади. У Трюдонинг баёнотидан сўнг Канадага яна бир бор 51-штат сифатида АҚШ таркибига киришни таклиф қилди.
7 январь куни Канада ҳукумати Трампнинг таклифига қатъиян рад жавобини берди.
Сайланган президент Трампнинг фикрлари Канадани кучли мамлакат қиладиган нарсаларни мутлақо тушунмаслигини кўрсатмоқда. Иқтисодиётимиз бақувват. Халқимиз матонатли. Биз ҳеч қачон таҳдидлар олдида орқага чекинмаймиз, деди Канада ташқи ишлар вазири Мелани Жоли.
Канада бош вазири Жастин Трюдо ҳам мамлакат ҳеч қачон АҚШнинг 51-штатига айланмаслигини таъкидлади.
Канаданинг Қўшма Штатларнинг бир қисми бўлиш эҳтимоли йўқ. Ҳар икки мамлакатдаги ишчилар ва маҳаллий жамоалар савдо ва хавфсизлик соҳасида бир-бирларининг энг йирик ҳамкорлари эканликларидан фойда кўрмоқда, деди истеъфосини эълон қилган Жастин Трюдо.
Изоҳ (0)