Eron oliy rahnamosi Ali Xomanaiydan yadro qurolini ishlab chiqishni taqiqlovchi fatvoni olib tashlash talab etilmoqda. Bu haqda The Telegraph xabar berdi.
Tegishli talab Eron Islom inqilobi qo‘riqchilari korpusi qo‘mondonligi tomonidan ilgari surilgan. Bunga sabab sifatida AQSH prezidenti Donald Trampning prezidentlikka saylanishi ko‘rsatilgan. Rasmiylardan biriga ko‘ra, bu Tehronni o‘ta zaif his qilishga majbur qilgan.
“Bu juda kech bo‘lmasidan uni qo‘lga kiritishning so‘nggi imkoniyatidir”, deydi nashr manbasi.
Yadro quroli va ommaviy qirg‘in qurollarini begunoh odamlarga qarshi qo‘llashni taqiqlovchi fatvo 2005-yilda Ali Xomanaiy tomonidan qabul qilingan. O‘shanda bu MAGATE (Atom energiyasi bo‘yicha xalqaro agentlik) yig‘ilishida e’lon qilingan.
So‘nggi oylarda Ali Xomanaiyga tashqi siyosat yo‘nalishini qat’iylashtirish talabi bilan bosim kuchayib bormoqda. 2024-yilda o‘nlab Eron deputatlari Milliy xavfsizlik oliy kengashini yadro siyosatini qayta ko‘rib chiqishga chaqirdi.
Hozirda bizda yadro qurolini ishlab chiqarish uchun zarur imkoniyatlar mavjud va yagona to‘siq — buni taqiqlovchi fatvoning o‘zidir, degandi Eronning xalqaro munosabatlar bo‘yicha strategik kengashi raisi Kamol Xarazi.
O‘tgan yozda Eron tashqi ishlar vaziri Ali Bageri Qani fatvoni buzishga hech kimning haqqi yo‘qligi, u barcha hokimiyat organlari tomonidan so‘zsiz bajarilishi shartligini aytgandi. Eron muxolifati kelajakda fatvo huquqiy ahamiyatga ega hujjat emas, balki tavsiya sifatida talqin qilinishi mumkinligidan xavotirda.
Izoh (0)