Politico: Tramp ma’muriyati G‘azo bo‘yicha kelishuvning ikkinchi bosqichi ustida ish boshladi

AQSH prezidenti Donald Tramp ma’muriyati Isroil va Falastinning HAMAS tashkiloti o‘rtasidagi kelishuvning ikkinchi bosqichini muvofiqlashtirish bo‘yicha ishni boshladi, deb xabar bermoqda Politico.

Nashrning qayd etishicha, ushbu bosqich qolgan garovdagilarni ozod etish, doimiy o‘t ochishni to‘xtatish va Isroil qo‘shinlarini Falastin hududidan to‘liq olib chiqib ketishni nazarda tutadi.

“Bayden bizga qoldirgan narsa bu oxirning boshlanishi emas, balki boshlanishning oxiridir”, dedi Tramp jamoasidan bo‘lgan amaldor.

Politico’ning qayd etishicha, AQSH prezidentining milliy xavfsizlik bo‘yicha maslahatchisi Mayk Uols va 21-yanvar kuni davlat kotibi lavozimini egallagan Marko Rubio bu masala ustida “zudlik bilan” ish boshlaydi.

Manbalar yangi ma’muriyatning Yaqin Sharq siyosatidagi ustuvor yo‘nalishlaridan biri sifatida Isroil va Saudiya Arabistoni o‘rtasidagi munosabatlarni normallashtirishni ko‘rsatishdi.

Isroil va HAMAS o‘rtasida o‘t ochishni to‘xtatish bitimi kuchga kirdi

Bitimning birinchi bosqichida HAMAS Isroil tomoniga 33 nafar garovga olinganlarni topshiradi, ularning aksariyati tirik deb taxmin qilinmoqda. Bular asosan ayollar, bolalar, keksalar, bemorlar va yaradorlardir. Bunga javoban Isroil yuzlab falastinlik mahbuslarni qamoqdan ozod qiladi.

Kelishuv shartlariga ko‘ra, Isroil armiyasi G‘azo sektori hududlarining aksariyat qismidan chiqib ketadi, faqatgina G‘azo sektori va Misr o‘rtasidagi Filadelfiya yo‘lagida, shuningdek, Falastin eksklavi va Isroil chegarasidagi maxsus bufer hududida harbiy mavjudligini saqlab qoladi. G‘azoning tinch aholisi o‘z uylariga, jumladan, janglar tufayli eng ko‘p zarar ko‘rgan shimoliy hududlarga ham qaytish imkoniyatiga ega bo‘ladi.

Politico: Tramp ma’muriyati G‘azo bo‘yicha kelishuvning ikkinchi bosqichi ustida ish boshladi

Mavzuga doir

Izoh (0)

Daryo.uz | Sizning muammoingiz yechimi