AQSHning saylangan prezidenti Donald Tramp joriy yilning 20-yanvar kuni o‘tkazilishi rejalashtirilayotgan inauguratsiyasigacha G‘azo bo‘yicha kelishuv tuzish yuzasidan Isroil bosh vaziri Binyamin Netanyaxuga bosim o‘tkazayotgani ma’lum bo‘ldi.
Bu haqda vaziyatdan xabardor bo‘lgan ikki nafar Isroil rasmiysi The Times of Israel nashriga ma’lumot bergan. Xabarlarga ko‘ra, Oq uy bo‘lajak ma’muriyatining Yaqin Sharq bo‘yicha maxsus vakili Stiv Uitkoff Netanyaxuga ushbu talabni yetkazgan.
Nashr ma’lumotlariga ko‘ra, 11-yanvar kuni Uitkoff va Netanyaxu o‘rtasida “keskin muzokaralar” o‘tkazilgan.
Amaldorlarning aytishicha, maslahatlashuvlar davomida bu masaladagi “muhim bo‘shliqlar” bartaraf etilgan. Isroil bosh vaziri 2024-yil mayda taqdim etilgan Isroilning uch bosqichli taklifining faqat birinchi bosqichida vaqtinchalik o‘t ochishni to‘xtatishni talab qilgan. Biroq, bitimning yakuniy variantida birinchi bosqich qolgan ikki bosqich bilan bog‘langan. Nashr suhbatdoshlarining ta’kidlashicha, birinchi bosqich kuchga kirgandan so‘ng, u Isroilning G‘azoga hujumlarini davom ettirishini qiyinlashtiradigan qoidalarni o‘z ichiga olgan dastlabki taklifga yaqinroq bo‘ladi.
Dohada Qatar, Misr va AQSH vositachiligida HAMAS va Isroil o‘rtasida asirlarni ayirboshlash va G‘azoda o‘t ochishni to‘xtatish bo‘yicha yakuniy kelishuvni ishlab chiqish maqsadida faol bilvosita muzokaralar davom etmoqda.
Netanyaxu Mossad direktori Devid Barnea va Isroil ichki xavfsizlik xizmati Shin Bet (Shabak) direktori Ronen Bardan iborat yuqori martabali shaxslarni muzokaralar uchun Qatarga yubordi.
Arab va Isroil rasmiylarining anonimlik sharti bilan The Wall Street Journal’ga ma’lum qilishicha, tomonlar asosiy bandlar bo‘yicha kelishib olgan, ammo ba’zi ta’riflarni muhokama qilishda davom etmoqda.
Shartnomaning yakuniy loyihasi allaqachon HAMAS tomonidan qabul qilingan, Isroil hukumati tomonidan tasdiqlanishi kutilmoqda, deb xabar berdi Associated Press manbalari.
AP va Reuters’ning yozishicha, bitimning uchta bosqichidan birinchisi olti hafta davom etadi, bu vaqt ichida HAMAS 33 nafar isroillik garovga olinganlarni, xususan, ayollar, bolalar, keksalar va yaradorlarni Isroildagi 1000 nafar mahbus falastinlik ayollar va bolalar evaziga ozod qilishi kerak. Shu bilan birga, Isroil qo‘shinlari G‘azo sektori aholi punktlarini tark eta boshlaydi.
Ikkinchi bosqichda jangarilar Isroil armiyasini anklavdan to‘liq olib chiqish evaziga qolgan asirlarni ozod qiladilar, uchinchi bosqichda esa HAMAS halok bo‘lgan garovdagilarning jasadlarini qaytaradi va tomonlar G‘azo sektorini qayta qurish bo‘yicha besh yillik rejani kelishib oladilar.
Izoh (0)