AQSH tomonidan Isroilning Yaqin Sharqdagi harakatlari qo‘llab-quvvatlanishi xalqaro tinchlikka erishish yo‘lidagi asosiy muammoga aylandi.
Bu haqda Eron tashqi ishlar vaziri Abbos ar-Aqchiy suriyalik hamkasbi Bassam as-Sabbog‘ bilan o‘tkazilgan matbuot anjumanida ma’lum qildi.
“Afsuski, BMT Xavfsizlik kengashi xalqaro tinchlik o‘rnatish bo‘yicha o‘zining asosiy vazifasini faqat bir davlat, yaʼni AQSH Isroilni bor kuchi bilan qo‘llab-quvvatlagani uchungina bajara olmayapti”, dedi ar-Aqchiy.
“Sionistik rejimga bosimni kuchaytirish va uning jinoyatlarini to‘xtatish uchun mintaqa, arab va islom dunyosidagi birdamlik juda muhim. Bu sa’y-harakatlar asosan samarali bo‘ldi, lekin Isroil rejimining G‘azo sektori va Livandagi jinoyatlarini, shuningdek, Suriyaga hujumlarini to‘xtata olmadi”, deya qo‘shimcha qildi diplomat.
Avvalroq AQSHning saylangan prezidenti Donald Tramp Oq uyga qaytishi bilan Isroilni qo‘llab-quvvatlashni kuchaytirishi mumkinligi xabar qilingandi.
“Chunki u o‘z ma’muriyatidagi asosiy lavozimlarga ashaddiy isroilparast qarashlari bilan tanilgan shaxslarni tayinlashni taklif qilgan”, deya yozdi The Washington Post.
Unga ko‘ra, AQSHning Isroildagi elchisi bo‘lishi mumkin bo‘lgan Arkanzas shtatining sobiq gubernatori Mayk Hakkabi G‘arbiy Sohilni Isroil tomonidan bosib olinishi tarafdori. Tramp tomonidan Mudofaa vaziri lavozimiga taklif qilingan amerikalik teleboshlovchi, Afg‘oniston va Iroqdagi urushlar faxriysi Pit Hegset Falastin davlatchiligiga qarshi fikrlarni ko‘p bora bildirgan.
AQSH Milliy razvedkasining sobiq direktori, Markaziy razvedka boshqarmasining (CIA) ehtimoliy yangi rahbari Jon Retkliff ham Isroilning ashaddiy tarafdori.
The Washington Post nashrning qayd etishicha, isroillik siyosatchilar Trampning saylovdagi g‘alabasidan xursandchiliklarini yashirmayapti va respublikachilar davrida Isroilning AQSH tomonidan qo‘llab-quvvatlanishi ortishiga umid qilishmoqda.
Uning fikricha, G‘azo sektoridagi gumanitar falokat va tinch aholining qurbon bo‘layotgani Isroilga harbiy yordamni davom ettirishga to‘sqinlik qilmasligi kerak.
Izoh (0)