Isroil bosh vaziri Binyamin Netanyaxu Iordan daryosining G‘arbiy sohilida “Temir devor” nomli aksilterror operatsiyasi boshlanganini e’lon qildi.
Isroil hukumati rahbarining tushuntirishicha, operatsiyaning maqsadi Jeninda terrorizmni ildizi bilan yo‘q qilishdan iborat. Falastindagi “Islomiy jihod” tashkilotining harbiy qanoti hisoblanmish “Saraya al-Quds” guruhi Isroil hujumiga qarshi turganini ma’lum qildi.
Netanyaxuning qayd etishicha, “bu Isroil hukumatining o‘z oldiga qo‘ygan maqsad — Yahudiya va Samariyada (G‘arbiy Sohilda) xavfsizlikni mustahkamlash yo‘lidagi yana bir qadamdir”.
“Biz Eron o‘qiga qarshi, u o‘z qurollarini qayerga yo‘naltirmasin — G‘azomi, Livanmi, Suriyami, Yamanmi, Yahudiya va Samariyami — tizimli va qat’iy harakat qilmoqdamiz”, deydi u.
Isroil armiyasining xabar qilishicha, “Temir devor”" operatsiyasi harbiylar, Umumiy xavfsizlik xizmati va chegara politsiyasi kuchlari tomonidan amalga oshirilmoqda. The Times of Israel nashrining harbiy manbasiga ko‘ra, operatsiya Jenindagi terrorchi guruhlar foydalanayotgan infratuzilmaga dronlar hujumi bilan boshlangan va kamida bir necha kun davom etadi.
Falastin Sog‘liqni saqlash vazirligi xabariga ko‘ra, Isroilning Jenindagi operatsiyasi chog‘ida to‘rt kishi halok bo‘lgan, 35 kishi jarohatlangan.
Isroil va HAMAS o‘rtasida o‘t ochishni to‘xtatish bitimi kuchga kirdi
Netanyaxuning qo‘shimcha qilishicha, Isroil “zarurat tug‘ilganda” G‘azo sektorida harbiy harakatlarni davom ettirish huquqini o‘zida saqlab qoladi.
Uning so‘zlariga ko‘ra, AQSH Isroilni G‘azodagi urushni qayta boshlashi uchun to‘liq qo‘llab-quvvatlaydi. Tegishli fikr AQSHning amaldagi rahbari Jo Bayden va saylangan prezident Donald Tramp tomonidan bildirilgan. Isroil bosh vaziri G‘azodagi o‘t ochishni to‘xtatish “vaqtinchalik” ekanini aytdi.
U agar ikkinchi bosqich bo‘yicha kelishuvga erishilmasa, AQSH Isroilga “harbiy harakatlarga qaytish huquqi”ni berganini ta’kidladi.
“Muzokaralar davomida men bir nechta prinsiplarni aniqlashtirib oldim: birinchi prinsip — agar kerak bo‘lsa, jangovar harakatlarni tiklash imkoniyatini saqlab qolish”, dedi Binyamin Netanyaxu.
U Isroil armiyasi o‘z kontingentini G‘azo sektori va Misr o‘rtasidagi chegara zonasi — Filadelfiya yo‘lagi hududida saqlab qolmoqchiligini aytdi.
“Filadelfiya yo‘lagidagi kuchlarni qisqartirish u yoqda tursin, hattoki ularni biroz ko‘paytiramiz ham”, dedi u.
Netanyaxu Isroil “urushning barcha maqsadlarini bajarishga” va “barchani uyiga qaytarishga” erishmoqchiligini ta’kidladi. Uning so‘zlariga ko‘ra, bugungi kunga qadar 157 nafar garovga olinganlar HAMAS asirligidan qaytarilgan, ulardan 117 nafari tirik. Isroil va Falastin harakati o‘rtasidagi bitimning birinchi bosqichi doirasida yana 33 nafar garovdagi isroillik uyga qaytadi.
Izoh (0)