Joan Roulingning mashhur kitoblari asosida yangi serial suratga olinmoqda. Ammo asosiy rolni ijro etgan Daniel Redkliff bu safar loyihada ishtirok etmasligini ma’lum qildi. U nafaqat Garri obraziga qaytishni istamayotganini, balki yangi avlod aktyorlariga yo‘l berishni to‘g‘ri deb hisoblayotganini aytdi. 
U o‘n bir yoshida ushbu mashhur franshizada yosh sehrgar rolini ijro etib, butun dunyo miqyosida tanilgan edi.
“Ular hamma narsani boshidan boshlamoqda, shuning uchun eski Garri rolida rol ijro etishning ma’nosi yo‘q. Bu mas’uliyat boshqa qo‘lga o‘tganidan xursandman, lekin shaxsiy ravishda uni o‘z qo‘limga olishim kerak deb o‘ylamayman. Ularga eng yaxshi tilaklarimni bildiraman”, — dedi Redkliff.
HBOning keljakdagi “Garri Potter” seriali Jоan Roulingning omon qolgan bola haqidagi barcha yetti kitobini qamrab oladi. Bu Warner Brosning muvaffaqiyatli film seriyasidan keyingi birinchi teleadaptatsiya bo‘ladi.
Ssenariy yozilishi iyul oyida boshlangan, bosh rollarni Dominik Maklaflin (Garri), Alastar Stout (Ron) va Arabella Stenton (Germiona) ijro etadi. Aktyorlar jamoasi to‘liq shakllangan, jumladan Voldemort roli ijrochisi ham, uning ismi hozircha sir saqlanmoqda va premyeraga yaqinroq e’lon qilinadi. Serialning birinchi mavsumi 2027-yilda chiqadi va jami yetti mavsum bo‘ladi.
“Garri Potter” film seriyasi 2011-yilda tugagan, Redkliff o‘shanda 22 yoshda edi. Shu vaqtdan beri aktyor yirik franshizalar va blokbasterlarda kamroq ishtirok etib, ko‘proq komediya loyihalariga e’tibor qaratmoqda. Jumladan “Mo‘jizakorlar”, “Shveytsariyalik odam”, “Yo‘qolgan shahar” va “G‘aroyib El” kabi loyihalarda ishtirok etdi.
Izoh (0)