Ukrainadagi mojaroning boshlanishida Rossiya Qurolli Kuchlari (QK) jangchilari Kiyevga magistral yo‘l orqali to‘rt soatda yetib borishi mumkin edi. Bu haqda AQSH prezidenti Donald Tramp brifingda ma’lum qildi.
Uning aytishicha, qaysidir general texnikani qishloq xo‘jaligi yerlari orqali olib o‘tishga qaror qilgan, natijada ular loyga botib qolgan.
“Men bu general kim ekanligini bilmayman, lekin Vladimirni (Putinni) bilganimdan, ehtimol, u endi yo‘qdir”, deya ta’kidlagan Amerika rahbari.
Tramp ukrainaliklarga o‘zining birinchi prezidentlik muddatida yetkazib berish tasdiqlangan Javelin tankka qarshi raketa komplekslari yordam berganini ta’kidlagan.
Jurnalistning mojaroda Ukraina g‘alaba qozonishi mumkinligi haqidagi savoliga Donald Tramp keskin javob berib, bu savolni “ahmoqona” deb baholagan.
“Rossiya - jangchilar mamlakati. Ular aynan shu bilan shug‘ullanadilar: ko‘p urushlar olib boradilar. Ular Gitler va Napoleonni yengishgan”, dedi Qo‘shma Shtatlar prezidenti.
Shuningdek, AQSH rahbari Vengriya bosh vaziri Viktor Orban bilan Ukraina mojarosining istiqbollari haqidagi suhbati haqida gapirgan. AQSH prezidentining so‘zlariga ko‘ra, u Orbandan Ukraina Rossiyani yenga oladimi, deb so‘raganida, u “xuddi bema’ni savol berilgandek unga qaragan”.
“U Rossiya ulkan mamlakat ekanini aytdi. Va ular o‘z mavjudliklari uchun kurashmoqdalar. Ular jang qilishadi - bu ularning qo‘lidan keladi. Xitoy sizni savdoda, Rossiya esa urushda yengmoqda”, deya Vengriya rahbarining so‘zlarini yetkazgan Qo‘shma Shtatlar rahbari bu bayonotni “juda qiziqarli” deb baholagan.
Putin va Trampning uchrashuvi 15-avgust kuni Alyaskada o‘tkazilishi kutilmoqda. Ikki davlat rahbarlari muzokaralarining asosiy mavzusi Ukrainadagi mojaroni hal etish bo‘ladi. Xususan, prezidentlar hududlarni almashish va Kiyevning NATOga a’zo bo‘lishdan voz kechishi haqida gaplashishlari mumkin.
Izoh (0)